日職仲有兩周，冠軍唔會變，一定係川崎前鋒（圖），連盃都已經捧埋，上次同大家講點都追前鋒對家，果然同鳥棲砂岩和咗1:1，冇令大家失望，周三日職又開快車，係唔係又追對家？我諗今次要停一停先，因為要考慮主場謝幕呢個因素。
前鋒今季剩低兩場聯賽，一場係周三主場鬥浦和紅鑽，另一場係周六作客柏雷素爾，即係話今場係前鋒今季最後一場主場出戰，日本球隊習慣對球迷好好，又好尊重球迷，多謝佢哋成季熱情打氣，所以都有主場謝幕嘅習慣，加上前鋒就算已經捧盃，都仲有天皇盃四強戰跟尾，教練都唔想球員狀態一直跌落去，所以追對家計劃今場要停一停。再睇埋初盤，前鋒對紅鑽要讓到球半，雖然有啲多，不過前鋒呢班人發起惡上嚟都幾得人驚，所以信得過。對手紅鑽近期又無態，已經三場冇好過，作客鹿島鹿角都輸四粒，今次前鋒穩陣。
周三另一場榜尾大戰，清水心跳主場對仙台維加泰，心跳就值得再追。尾二嘅心跳，𠵱家領先包尾嘅仙台維加泰一分，主場贏波就一定唔使包尾，雖然古語有云：「寧願垃圾班考第一，都唔想精英班考包尾。」不過今次因為疫情關係改例，兩隊都一定唔使降落日乙，只係決定吓最終排名。仙台雖然個勢唔差，上仗贏大分三神，不過好少連續兩場有水準，清水主場連前鋒都和到，唔可以睇少，初盤心跳讓平/半，落得啦，唔好諗！
文：黃耀富
截稿前馬會尚未開盤，盤口僅供參考，讀者記得留意足智彩網頁。