特首林鄭月娥公開話將會引入嘅武肺疫苗有內地產品，仲話明市民打針冇得揀大陸定外國品牌，搞到好多網民話情願唔打住，都唔想打國產疫苗。777前晚用美帝嘅facebook出post拍心口話：「只要有任何一款新冠肺炎疫苗在香港核准作緊急使用，我和團隊會第一時間接種。」一班建制啦啦隊當然跟機，投誠話願意接種國產疫苗，仲拎埋袁國勇出嚟批鬥以示忠誠。
好似工聯會麥美娟，佢話社會唔應該對國產疫苗有偏見，唔應該將抗疫混合政治，仲話願意「以身作則」先行接種；民建聯陳恒鑌就典型藍絲mode，話「你唔信國產疫苗，可以唔打！」話唔應該妖魔化大陸疫苗，又建議畀市民接種疫苗後，可以免檢疫14日上大陸，增強市民接種疫苗誘因喎。
同樣藍絲mode嘅唔少得西門梓敬，佢話「嗰啲話唔打中國制（製）疫苗嘅小黃人，唔該掉晒屋企Made in China嘅產品先，跟住再掉埋自己，因為你自己都係Made in China。」仲拎港大微生物學系講座教授袁國勇出嚟「binC」，事關袁教授5月講過「寧戴口罩、不打疫苗」。教授話，疫苗必須要有效且必須安全，所以即使有新疫苗出現，佢都會睇定啲，等一年後睇吓有咩副作用。西門梓敬就拎呢句「寧戴口罩、不打疫苗」，呼籲大家留四字詞畀教授。
李八方