壹傳媒創辦人黎智英上星期六俾律政司加控違反國安法新罪名，根據傳媒引述控方嘅「罪證」之一，就係佢嘅Twitter追蹤咗美國國務卿蓬佩奥同台灣總統蔡英文等人。原來香港人留意外國政要已經係一種「罪名」，咁喺國家安全大前提下，八方自然要check下有冇建制陣營嘅Twitter都追蹤境外敵對勢力賬戶。點知原來差人嘅Twitter賬戶，竟然「勾結」好多外國勢力，連美國中央情報局（CIA）都有份！
以為自己肩負保家衞國重任嘅香港PoPo，佢哋個Twitter賬戶呢，原來「勾結」咗好多外國勢力，雖然只係follow咗57個賬戶，但當中有足足35個係外國勢力，其中日本勢力比例最高，57個中有四分之一係日本唔同地方或者唔同部門嘅警察Twitter賬戶；另外世界各地嘅警察部門，包括美國紐約、華府同波士頓、英國倫敦、曼市同當地交通警，以至澳洲、新西蘭、新加坡等地警方，都成為香港PoPo追蹤對象。最精采係佢哋連美國聯邦調查局（FBI）同CIA都唔放過，CIA擺到明係美國情報機關，追蹤佢哋冇理由唔敏感過追蹤蓬佩奥個Twitter啩！
除咗PoPo，作為戰狼外交代表人物嘅中國外交部發言人趙立堅，佢個Twitter都一樣精采，追蹤咗17萬5千幾人，當然同樣係以外國勢力佔大多數，當中亦有大批外國領導人同政要，甚至美國國務院都係佢追蹤目標。八方仲發現，有「關注」鹹網同AV女優嘅趙立堅，冇追蹤美國總統特朗普呀，但就追蹤咗人哋個女伊萬卡，唔知係咩原因呢？
李八方