世界一日比一日荒謬，惟有逃離現實，從公仔箱尋找一絲慰藉。
近期最擄獲人心非《全民造星III》莫屬，歌好聽、舞好睇，參賽者團結、真情流露，收視、口碑贏聲稱「最多青年觀眾」的隔籬台幾條街。
節目內不少表演都令人耳目一新又印象深刻，Manson和Zeno領演的《我們》唯美得來帶有遺憾，也難忘幾位女巫的歌聲和歡樂，Cloud和Mischa表現也特別耀眼，A組全隊11人以《True Colors》作結，猶如畢業禮，情感極為真摯。
早幾集的《給十年後的我》亦是催淚作，也是杜夫人最愛之一。「那時候你所相信的事，沒有被動搖吧？」身於風雨飄搖、恐懼不安的時代，但願大家能守護自己的稜角。
不是專業電視精，彷彿大家重新再追看電視，公司要做品牌推廣，除咗社交媒體外，又多一個戰場。《全民造星III》成為全民話題，冠名贊助的天星銀行應該叨到光，知名度肯定有提升，在虛銀廣告戰中先贏一分，不過，筆者身邊真係極少朋友因而開戶，要將知名度轉化做上客量仍要加把勁。
眾安銀行運仔就差啲，廣告其中一位參演者孔德賢負面新聞纏身，吸嬲指數飆升。愛情確實難分對錯，筆者只戥銀行品牌推廣部同事唔抵，但要一讚facebook小編順應民意P走咗涉事人。參與廣告戰的另一員是Livi，搵咗yuu嗰位林德信及家英哥介紹「求分攻略」，話題性一般，但小編tag落「我不想努力了」都算有sense。
最後講埋匯立銀行，搵嚟Ben Sir拍咗「知你港乜」系列短片，同樣喺viu落廣告，叫人拿拿臨開戶，雖然「星味」不足，但勝在夠貼地和過癮。可靠消息透露，該行即將使出撒手鐧，搶到韓國人氣女團BLACKPINK YouTube演唱會的香港獨家贊助。
江湖傳聞每個國家或市場只限一位廣告商戶，爭崩頭先有機會贊助，其他贊助商包括百事可樂、蘋果、Oppo，匯立決策層睇嚟都走在潮流尖端，兼有國際視野，搵「星」都要搵紅透半邊天的國際巨星，呢場廣告戰，好睇！
杜夫人