何超儀前日喺Ig分享為老公陳子聰慶祝48歲生日，雖然陳子聰四年前曾經因肝病入ICU，不過近照見佢精神唔錯，只係留咗長鬚有啲滄桑。另外，前日係楊洛婷同樂隊Dear Jane主音黃天翱（Tim）結婚六周年，今年佢哋冇出埠，但就盛裝喺人造飄雪下影相同跳舞，楊洛婷話揀12月結婚，係因為熱愛聖誕。
政府早前收緊防疫措施，陳豪日前先話自己一家五口出街會被人拉，所以暫時唔會外出食飯。不過老婆陳茵媺噚日就帶三個仔女去行山，仲喺Ig貼出短片同相，陳茵媺仲除低口罩，雖然佢話轉頭會戴返，但網民勸佢留喺屋企好啲。
「大劉」劉鑾雄同舊愛呂麗君所生嘅大女劉秀盈，已經18歲，四歲學芭蕾舞嘅秀盈，噚日同媽咪呂麗君（左）齊齊穿上芭蕾舞裙，擺出同一舞姿，秀盈自爆今次係媽咪第一堂學芭蕾舞。
林子博愛妻董燕君上個月不敵癌魔病逝，子博強忍傷痛，近日就同一對仔女拍廣告，一齊喺床上睇電話、子博捧蛋糕畀囝囝時，又被水槍射臉，非常溫馨。子博對於仔女表現畀足九分：「佢哋好自然，做到導演要求。」
