【名家足路】
【對決場次︰狼隊vs阿士東維拉】
上期《一燈決》諗住揀場法甲里爾對摩納哥，以為可以難倒筋肉人，點知里爾主場真係唔怕摩納哥。今次筋肉人就揀咗狼隊對阿士東維拉，返到英超我呢場就投狼隊一票！
大家都知狼隊上場作客畀利物浦大炒4:0，當中第一球仲係隊長中堅高亞迪嘅犯錯㖭，都輸得幾難睇，不過正所謂知恥近乎勇，呢場嘅失利相信會令球隊上下睇到自己嘅不足。有留意開狼隊嘅球迷都會發現，其實佢哋近兩場都由三中堅陣式改咗做踢四後衞，對住近況唔太好嘅阿仙奴就贏到，對住利物浦可以話即刻見晒底，我就覺得今場領隊紐奴應該會轉返踢三中堅，起碼畀啲球員拎返啲信心先。
狼隊嘅墨西哥射手魯爾占美尼斯喺對阿仙奴時同大衛雷斯驚險撞頭要做手術，好彩佢已經完成咗手術返咗屋企休養。球隊今場就肯定冇佢㗎喇，不過狼隊最出名係葡萄牙力量嘛 ，前場就要靠葡萄牙孖寶柏度尼圖同埋普丹斯喇。其實兩位今季暫時嘅表現都唔錯，特別係柏度尼圖，個人技術同射術都掂，聯賽已經入咗三球，只係少魯爾占美尼斯一球，今場狼隊嘅前場都要靠晒佢 。
維拉季初的確係威係勢，先係大炒利物浦，再殺埋李斯特城，不過球隊近況唔係幾好，近5場贏得1場，似乎已經冇咗季初嗰股氣勢，而且球隊進攻太依靠「柏豪」基亞利殊，只要佢狀態唔夠或者俾對手睇實，已經令維拉嘅進攻威脅大減，加上狼隊上季聯賽雙殺過維拉，今場都應該冇問題嘅 ！
文：港生
《一燈決》係今季新欄目，由上月擂台盟主同上月燈神拗吓頸，睇吓讀者信邊個。