喺武肺疫情下，全人類都要適應所謂「新常態」，嚟緊嘅聖誕節，好難好似往年咁成班朋友出嚟一齊玩，而聖誕party（圖）一向係英超球隊內部一年一度盛事，但據《每日郵報》講，英超球隊已勒令球員，千祈咪私下開P。除咗免得爆疫情，隨時搞個「Party群組」，仲有就係到時啲party相流出咗，一定惹起平民百姓不滿，隨時引發公關災難都唔奇。家陣英國防疫政策係唔畀室內有社交聚會，但批准最多六人「商務會議」，不過唔好諗住走法律罅，被捉到一樣會被告違犯限聚令。車路士領隊林柏特已經講明，球員要做好榜樣。但譚美阿巴謙同芝維爾之前違規「開P」，今次又會唔會乖乖地真令人好懷疑。