【名家足路】
【對決場次︰狼隊vs阿士東維拉】
上期《一燈決》推介里爾小勝摩納哥，延續小弟喺呢個專欄嘅強勢，所謂贏開唔好畀佢停，今輪揀咗場英超再同港生拗手瓜，狼隊主場對阿士東維拉，我就撐「維拉周柏豪」嘞。
兩支位列中游球隊對碰，有主場之利嘅狼隊今季聯賽喺地頭只係輸過畀曼城，對維拉少讓平/半，莊家好似睇高少少，不過，小弟覺得前鋒魯爾占美尼斯缺陣，對佢哋簡直係一大打擊；狼隊冇咗呢位喺前面停到波嘅重心球員，上輪即畀利物浦大炒。
狼隊今季啞火，踢咗11場入得11球，攻力同下游嘅富咸一樣，大跌watt除咗最大原因係迪亞高祖達轉會紅軍外，艾達馬查奧爾踢唔番上季水準亦係關鍵，呢位曾經被高普大讚嘅西班牙中場，今季未開齋之餘，連助攻都欠奉。
維拉積分榜落後狼隊兩分，原因唔係踢得差，只不過係佢哋踢少兩場啫；今季維拉特色作客好過主場，3場作客勝仗全部0失球，證明新加盟嘅門將達米安馬天尼斯係優質股。要數佢哋今季代表作，唔可以唔提7:2血洗利物浦，呢場奧尼屈堅斯「戴帽」，但表現搶鏡反而係基亞利殊，呢位維拉周柏豪2入球3助攻，數字嚇死人，25歲仔當打又靚仔，早前國際賽仲榮升三獅大國腳，如果佢可以改善場外紀律問題，隨時上位做Super Star。
維拉今仗除咗巴克里腿筋受傷缺陣外，其餘主力冇傷冇病，加上佢哋上周冇比賽，有足夠時間備戰，體能估計都好過主隊，客勝或下盤諗得過。
文：筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。