國際足協（FIFA）周四公佈上季最佳陣容候選55強名單，上季三冠王嘅德甲班霸拜仁慕尼黑成大戶，有11人入圍。美斯、基斯坦奴朗拿度（C朗）等常客亦有份。去季拜仁表現出色，繼早前歐洲足協嘅最佳陣容候選50強名單有10名球員入選，今次FIFA最佳陣容55強，就有羅拔利雲度夫斯基、紐亞、阿拉巴、甘美治、謝路美保定同湯馬士梅拿再入選，另外艾方素戴維斯、基拿比同哥列斯卡就首次入選。多蒙特前鋒艾寧夏蘭特、阿仙奴前鋒奧巴美揚、曼聯中場般奴費南迪斯、熱刺中場迪利阿里，同利物浦中場佐敦軒達臣亦第一次入圍。FIFA年度最佳陣容由各地球員挑選，喺12月17日FIFA頒獎禮揭曉結果。