武肺疫苗即將推出，美國經濟復蘇將邁進一大步，宅經濟股將首當其衝，率先轉弱嘅係宅經濟龍頭Amazon，除非新業務出現大突破，否則未來幾個月難以擺脫易跌難升格局。不過，每逢出現短線單邊跌勢，又會成為低撈博反彈機會。
Amazon早一步轉弱，難保弱勢慢慢感染至其他市值較低嘅宅經濟股。Freelance平台Fiverr高位回落幅度只得一成左右，雖說疫情令宅經濟嘅市場滲透率上升，已培養出普羅大眾嘅使用習慣，但實體經濟回復正常在望，市場總會憂慮對宅經濟衝擊，估計呢類股份全年業績公佈前，總會出現一輪短期沽壓。港股方面，港視（1137）又如何？暫時守住保歷加中軸，但於高位附近形成三頂，距離高位反彈一成又會有強大阻力，現價已欠勝算。
疫苗誕生前夕，疫苗股悉數回吐，Moderna單日跌8%後仍然喺5天線水平，至於輝瑞同樣守住5天線，未算轉弱，估計喺高位仍能反覆向上一段時間。美股跌市之下，3月始由聯合科技分拆出嚟嘅疫苗物流概念嘅開利（CARR）股價連續兩日反彈，樓上冇蟹貨，3月分拆至今升逾2倍，論累積升勢已不算太離譜，睇嚟股價要破頂難度唔高。
晉佳