日職仲有最後三周就大團圓，球員就可開心過聖誕，亞冠盃賽程得番東亞區準決賽同埋對伊朗球隊柏斯波利斯嘅決賽，16強樣衰出局嘅橫濱水手，已返咗日本準備最後一周聯賽，但同樣16強出局嘅FC東京就慘啲，佢哋出發亞冠盃前，比水手踢少咗一埸，所以返日本仲有兩輪賽事，真係慘過死，所以今個星期重心，一定係FC東京……對家。
個人覺得FC東京比起幾支參戰亞冠盃嘅球隊，真係好一般，發揮亦都唔穩定，贏隊半力出擊嘅珀斯光輝1:0，已經唔係叻，16強對住FC北京，畀對手射入一球後真係冇力反撲。球隊成個亞冠盃都死氣沉沉，返到日本唔夠七日又要踢日職，星期六就要主場鬥廣島三箭，心態上一定攰死，爭勝欲望喺邊？冇！反觀廣島三箭雖排第八，不過只要一贏波就可以過東京頭，就算冇咩實際意義，但對住疲於奔命嘅東京，實行有殺錯冇放過嘅心態！FC東京受讓平/半都咪搞，上盤加多個「大」，穩陣。
另一場心水係川崎前鋒，不過又係要前鋒對家，小弟上星期就喺佢身上執到多少，事關前鋒爭勝心冇晒，就算球員基本能力強，好似上場畀清水心跳逼和咁，心跳只係靠大打主場爭氣波就和到你，前鋒最後三周聯賽，用咩人都追對家，球員始終都係人，點到要為下季考慮，大局已定冇必要盡搏整傷，下季又要應付聯賽、亞冠盃等幾條戰線，留得就留，周六鳥棲砂岩主場對前鋒，鳥棲受讓一球，都係下盤加「大」啦！
文：黃耀富
截稿前馬會尚未開盤，盤口僅供參考，讀者記得留意足智彩網頁。