姐姐老而彌堅的玉腿獲得一致讚美，年青力壯的訪問者雖然交唔足戲，總算擺出拜倒石榴裙姿勢，阿婆直頭溫馨過跳老舞畀職業舞伴攬實，心花怒放到不吝公開何處有減價靚衫賣，淘寶趁機推出A貨，肯定在大媽群組引爆搶購潮。有人歡喜有人愁，唐滌生話齋「女子由來心眼淺」，和老公冇乜兩句的妹妹聽聞，不知道會唔會又試立即黑面，剛剛重拾的自信搖搖欲墜就大件事——據說正打點行李準備北上應召哩，成屋銀紙冇碇使，姐姐唔約埋一齊濕平不特已，仲公然單單打打，太唔夠義氣了，嬲嬲之餘，難免諗起先排陳年婚紗相被好事之徒摷出嚟評頭品足，網民公投邊個省鏡，結果姐姐山泥傾瀉式取勝的恨事，真令人擔心張牙舞爪的英姿一下子打回原形，面聖時繼續將一團黑氣傳染維尼他老人家。
此嫗最近狀態大勇，回應前立法會議員銀行戶口凍結事件，一時亢奮竟高調批評別人講大話，完美示範何謂有口話人冇口話自己，當正冇人察覺她的大牙早就甩鬼晒。那句「如果對香港金融機構有乜任何損害，這位人士就是元兇」，難得傳媒好涵養，冇笑笑口回答：「林太你真係謙嘅唧，輿論早就封咗你做攬炒之母，唔使推莊嘞。」她上任以來的豐功偉績有目共睹，否則《蘋果》廣告統計員也不會眼紅到日日夜夜搵位刷存在感，居然大言不慚「政府做嘢有規有矩，我哋係要講證據、講事實」，真係想唔寫個服字都唔得。另一篇專訪，記者問他日壽終正寢蓋棺論定，希望世人如何評價，如常耍一輪太極之後她忍不住透露卑微心聲：「希望大家記得我係香港人特首。」啊，放心去吧，歷史一定記得。