C從小便是個容易擔心的人，出來工作後，每次轉換新環境，也會擔心不能應付新工作，又怕自己表現不佳，會被老細鬧，甚至被辭退。但其實多年來，在上司眼中，C雖然不是最醒目，但勝在夠勤力，未必做得最好，但很少會出現大問題，所以算是一位可靠的同事。不過，即使身邊家人和朋友不時提醒C他過份擔心，但C仍然控制不了自己焦慮的情緒。最近，因為疫情影響，公司業務有點不穩定，他又開始擔心萬一業績真的不理想，不知該怎麼辦，因此又開始焦慮起來。
其實C患了焦慮症多年，頗清楚自己的問題，也閱讀過焦慮症的資料，所以，他跟醫生說：「我知我呢啲係災難性思想，樣樣諗到最差，其實我知道公司嘅業績，有好多係外圍因素嘅影響，我都無辦法可以改變，但唔知點解，我控制唔到自己個腦不停咁諗，不停咁擔心，醫生，有啲乜嘢可以做得到，幫到我啲焦慮呀？」
C的意思是，有沒有甚麼輕易、簡單的方法，例如行吓山，跟朋友傾吓偈，又或者做其他事情分散一下自己的注意力，總之不用太辛苦的方法，便可以把這個災難性思想甩掉，不過醫生認識C多年，覺得C其實要認認真真去面對自己心裏面的恐懼，所以跟C說：「你有無聽過worst case scenario？即係話最壞打算嘅情況下，你覺得情況會點？」
C不用半秒便回答：「最壞打算咪係俾老細捉入房照肺囉，照幾耐？五分、十分鐘到啦。」
「咁即係最差嘅情況都係老細鬧，唔會無咗份工，假設真係有機會無咗份工，呢個機會有幾大呢？」醫生問。
「唔，百分之一左右啦，因為我抵得諗，其他事情又無乜出錯，公司嘅業績又未差到要炒人嘅地步。」
「咁即係話至差嘅結果係被炒，不過機會只有一百分之一，更大可能嘅係俾人照肺，不過都係鬧五分鐘到十分鐘啫，啱唔啱？」
C聽了這個分析後，雖然未至於焦慮立即完全消失，不過心定了很多，他覺得這一招「最壞打算」頗有用，用最壞打算來分析最差的情況到底會如何，機會有多大，可以比較有效地控制自己的災難性思想。
李德誠 精神科專科醫生