自從特首林鄭月娥聲稱以前嘅佢返晒嚟之後，佢日日接受訪問高舉國安法同向北京交心，以示北京支持之餘，更力爭做多五年。正當政界認為777今次肯定獲北京歡心時，呢兩日忽然有班建制「健筆」，輪流寫文圍插777抗疫不力，當中更包括藍絲健筆屈穎妍，力數777之餘，更直言當日撐錯佢。政圈中人對此異象無不嘖嘖稱奇，有人猜測係689陣營捲土重來，但亦有人覺得唔止咁簡單，可能有人春江水暖，嗅到風向有變，背後發功插777。
先講穎妍喺《頭條日報》專欄嘅鴻文，開宗明義話「我不是建制派」，力數777不是，當中精句八方唔盡錄喇，總之佢先「認錯」話三年前特首選戰時睇錯人，其後就批評777不懂民情、施政無能，完全未能解決眼前困境，最後自比《國王的新衣》入面嗰個老實小孩，令八方都忍唔住要笑呀。
其實針對777嘅批評聲音唔只一例，外號「自宮發言人」前新聞統籌專員馮煒光早兩日亦喺網媒「點新聞」出文，表面批評香港專家精英喺抗疫工作上「崇尚歐美、輕視內地」，但同時燒埋777：「可惜『返晒來』的特首林鄭月娥，有的只是『政務主任思維』，而不是特首的領導力」，一啲面都唔畀囉。
呢兩個689陣營嘅「健筆」開炮，不難令人猜測係咪689想捲土重來選特首？但有政圈好事之徒話，其實「香港01」早排有篇文，由創辦人于品海具名以「連問題都看不清 『好打得』又有何用」為標題撰文點評《施政報告》，內文除咗直線抽擊話「以為平息了動亂，香港就可以回復安定繁榮，舞照跳、馬照跑，那是癡人說夢」外，結語仲白得驚人：「因為如果再看不清楚，有可能連自己的政治生命都要搭上，到時候，是否『好打得『已經沒有多少意義』」。
政圈好事之徒話，于老闆當年連689都未知，已「預告」佢冇得留低，之後亦力挺777上位，以于老闆人脈加上了解北京心思，點會押錯寶？佢落得自己個名出文，肯定有料到，北京對777風向係咪有變？應該好有趣。
李八方