特區政府抗疫無能，已經係毋須討論嘅事實，只係睇下食衞局局長陳肇始仲未識戴口罩，已經知道佢哋靠唔住，但其實唔止政府官靠唔住，建制中人亦有唔少「智將級」軍師。好似做過食衞局政助同立法會議員嘅陳凱欣，噚日拋咗條佢自覺好勁嘅橋，但一出街之後立即畀網民鬧爆，問佢個腦究竟裝乜？
點解網民火滾？因為陳凱欣建議政府喺呢個月20號到下個月2號呢14日，全城留家抗疫兩星期，每家每戶只可以派一個人外出買嘢，等政府可以好好利用呢個時機控制疫情。但好快有網民發現呢條所謂「好橋」有問題，如果每個屋企只得一個人出得街，咁仲邊有人去超市、街市開工？咁冇人開工，又邊個可以開舖賣嘢畀市民？八方見有網民為呢個咁艱深嘅難題，特別向陳凱欣留言請教，希望佢提供解決方法，但一直未見有回覆囉。
李八方