傳媒落幕 - 左丁山

傳媒落幕 - 左丁山

傳媒機構不斷靜靜雞裁員,自動解約者一概不留人,夠運捱到退休的,離開後未必有人替補,故此一位物業管理界資深人士不時對左丁山說:「物業管理係朝陽行業,傳媒係夕陽行業,你知道有記者編輯被炒,唔該通知我哋一聲,睇吓有冇記者編輯願意轉行做物業管理。」碰啱近日有線炒人炒得幾肉酸,成為熱門話題,呢位老友早前已經第一時間招聘空中小姐空中少爺做物業管理,呢次唔知有冇與一眾被炒或自動辭職記者接觸呢?細路哥讀書時有粵語殘片,左丁山細細個最記得一幕就係張英或張活游,唔記得清楚啦,做記者撲新聞做到在報館嘔血,還要畀老闆鬧,覺得係人間慘事;點知後來在樓下同人睇住報紙檔,博覽群報,睇得多,心思思大個仔後做記者,後來偶然透露心聲,立即畀大哥鬧到狗血淋頭,話做記者一世捱窮,後來入新亞咪讀經濟系囉,一家高興!到升三年級,心思思又去報考新聞系(當年係二年制),經劉兆銘教授及魏大公博士面試,收咗,回家報喜,見先父黑晒面,大哥聽見急忙回家喝罵,於是又放棄不讀,畀魏博士在細小農圃道校園碰到就鬧,話嘥咗個學額!

點知神推鬼擁,1990年還是加入了傳媒,離開中環銀行、投資界,可能係前生註定。轉咗行就搵少好多銀,睇見同輩搵到風生水起,有冇後悔轉行呢?其實係冇,銀両雖然少咗好多,但眼見老友搵銀升級之餘,精神心智身體亦付出不少,老友們愈升愈高級,做到行長又點話,生活不是自己的,總之是人在江湖,身不由己。一次一位大班級人物對左丁山講:「某日在歐洲某酒店早上突然紮醒,擒擒青食完早餐去開會,公司派司機來接,我問司機,今日我喺邊個城市,司機愕然,答話阿姆斯特丹,我為之啞然失笑,真是夢裏不知身是客,人哋以為我好風光,其實有時似遊魂任人擺佈,點似得你可以完全掌握自己生活時間表及節奏,放任到一年去足10個月跑馬!」呢樣當然重要,但最過癮嘅係做傳媒與香港三十年變遷同步,有不少時事有自己參與其中,將生平興趣與搵銀過活融合一起。可悲嘅係呢段人生生活快告一段落,見到肥佬黎闖進傳媒第30年頭,竟然受國安法伺候,當知道左丁山一輩所認識之香港,行將落幕!