姐姐新民黨葉劉淑儀夠晒戰鬥格唔需要八方多介紹，佢日前就同財經專欄作家渾水會師港台節目《視點31》同場激戰，面對住喺91年出世屬羊嘅渾水，以為會上演一幕「送羊入虎口」，點知一開場就出現反高潮，渾水竟然喺鏡頭前對住葉劉講句：「我覺得你對腳真係好靚」，立即為網上瘋傳，背後其實係渾水同網上作家葉朗程嘅一場善舉，而葉朗程見渾水咁都講得出，即時加碼捐多一倍，祝渾水同葉劉「輪迴一百次也可以浪漫下去」！
話說原來喺呢場激戰未開波，網上作家葉朗程先同渾水發出挑戰，話只要渾水可以喺鏡頭前對住葉劉講句：「我覺得你對腳真係好靚」，就即捐10,000蚊畀渾水指定嘅慈善基金或傳媒機構，結果渾水為咗做到善事，真係將呢句八方唔想覆述嘅說話講出口，雖然講得唔夠自然，但肯定完成挑戰，而葉劉都好受落喎，節目出街之後仲喺fb發帖多謝渾水送佢一紮小花，又提葉朗程要遵守諾言。渾水亦好有風度隔空留言回覆，話「葉太，和你激戰，我很快樂。」
八方就問過渾水「戰後感」，佢話一切構思嚟自葉朗程，「如果做到一個效果，有人捐錢，何樂而不為？」而始作俑者葉朗程噚日下晝亦言出必行，就自己要求渾水「眾目睽睽下情挑七旬熟女」一事「找數」，仲話如果渾水公然戀腳值10,000元，咁「葉太公然晒腿，又何嘗不值10,000元呢？」，加上想攞個意頭，於是決定捐出20,339元去渾水揀嘅受惠機構「精神健康基金會」，仲話呢個金額數字「寓意愛你生生夠，祝兩位輪迴一百次也可以浪漫下去」喎！
李八方
