港版國安法下人人自危，「港獨」變成敏感字眼，就連媒體都要改名「避險」？八方噚日發現，網媒「香港獨立媒體網」嘅facebook名突然改名為「獨立媒體inmediahk.net」，Instagram 同Telegram都統一改咗名。
獨媒主編黃俊邦回覆八方話，呢個決定係前日作出，但由於之前都試過畀法官問：獨媒係咪支持香港獨立？所以媒體內部其實已經就改名討論過好多次。原來早喺2017年，特首林鄭宣佈放寬網媒登記嗰陣，佢哋嘅新聞註冊已經叫「獨立媒體」，「所以如果話改，其實一早改咗。」不過佢都承認，港版國安法都係今次決定嘅考慮因素，但係改名、報道內容、落唔落記者名之類，都只係其中一樣「應對」，最擔心係有投稿人撰稿，「因為我哋真係會成篇刊登出嚟。」好似今年5月份，獨媒正因為刊載荃灣區議員岑敖暉 「周梓樂被香港警察謀殺身亡，半年」的文章，收到律政司來信，文章暫時下架，並要索取法律意見。
黃又提到，當年幫獨媒改名嗰陣，係參考咗台灣嘅獨立運動，所以好刻意咁將獨媒前面加上「香港」，想話「獨媒」立足於香港。但係近幾年，出現好多「少麻煩」同「五毛打手」，令佢哋運作上受到影響。但其實大家都會簡稱「香港獨立媒體」做「獨媒」，所以黃主編話，如果公眾嘅認知唔係叫「獨媒」，佢可能都會保留返個原名喎。
李八方