無綫前監製錢國偉今年10月因胰臟癌病逝，終年58歲。遺孀陳宛蔚昨日為丈夫在沙田寶福紀念館設靈，今日早上出殯。錢國偉生前人緣極好，逾半百圈中好友現身送別，包括許志安、鄭中基、張衞健和唐詩詠等。現場有派發特刊紀念錢國偉，陳宛蔚寫了一篇文章予摯愛︰「我跟你來生一定要再遇上，手牽手到白頭。」她接受訪問時形容亡夫一生精采。
曾監製過不少熱爆節目如《獎門人》系列、《殘酷一叮》、《美女廚房》等的無綫前監製錢國偉（Wilson），於今年10月27日因胰臟癌病逝，終年58歲。其遺孀陳宛蔚昨日在沙田寶福山紀念館地下的寶福堂為他設靈，喪禮以佛教形式進行，今日完成大殮儀式後，靈柩將會奉移到大圍富山火葬場火化。錢國偉生前廣結人緣，昨日不少圈中好友現身送別，包括許志安、張衞健、蘇永康、鄭中基、姚子羚、蔡卓妍、吳婉芳、樂易玲、陳志雲、王喜、羅家英、唐詩詠、陳蕊蕊、劉俐（藍莓）、孫慧雪、何麗全、方力申、周家蔚、湯盈盈、林芊妤、阮兆祥、林盛斌和小肥等。
錢家家屬在下午約5時安排傳媒入靈堂，鞠躬及拍攝靈堂內的照片，靈堂門口有一張用金色畫框裱起、錢國偉用手托頭的照片，旁邊有有白色蘭花陪襯。至於錢國偉的遺照是一幅戴着眼鏡微笑，雙手托頭，而靈堂正中央有心形花圈，是太太陳宛蔚與女兒Abby所送。除陳宛蔚之外，身為治喪委員會成員的鄭伊健蒙嘉慧夫婦、林曉峰、黎芷珊及林珊珊、黎諾懿等站在陳宛蔚身後，一起代表家屬向來賓致謝。之後陳宛蔚由兩個妹妹及錢嘉樂、林曉峰、黎芷珊等好友伴隨下，到靈堂外接受傳媒訪問，着黑色素服的陳宛蔚，表面看心情平靜，但說話時眼濕濕：「咁多位有心喇，我明嘅，Wilson係短暫啲，但人生好精采，我想代表佢感激，佢今生遇過嘅人同事，無論好與壞，我都覺得係成就咗佢精采一生。」
談到現在的心情，她坦言：「都要面對，老公（後事）一定要做到最好，所以我都會秉承佢嘅精神，會照顧好自己同個女，收拾好心情，我知老公係開心嘅，所以今日係farewell party。」囡囡知道爸爸走了嗎？她說：「知與唔知啦，都同佢傾過，都要時間適應，佢都有搵爸爸。」問到Wilson的遺願？她說：「冇呀，呢生都好充實。」
最後問到陳宛蔚的經濟問題，她笑一笑後答：「Wilson的確係屋企嘅經濟支柱，但就好感恩呢班朋友關心同愛護，我會工作嘅，我會努力去生活。」現場有派發特刊紀念錢國偉，陳宛蔚寫了一篇文章予摯愛，她對Wilson表示，叫他放心，她會努力撫養女兒，讓女兒如他一樣延續其開心的基因再發光，又寫道：「我知你永遠會在看守著我們，我跟你來生一定要再遇上，手牽手到白頭。」
錢嘉樂被問到失去這位好朋友，心情是否十分不捨？他表示：「係都要面對嘅，不過最唔捨得嘅應該係阿Lo。」阿Lo被提到在錢國偉患病期間，經常陪伴睇醫生和接載出入，感受會否更深？阿Lo表示：「肥仔（錢國偉）用佢成個人生同大家講，點樣精采去生活，我好慶幸都陪到佢屋企人同Wilson，度過呢啲時間。」至於與阿Lo夫妻緣盡的康子妮，昨日傍晚亦與兩兒子到場致祭。連詩雅則說：「我出道兩年後發生咗啲事，都唔知可唔可以繼續係呢行生存，係Wilson搵我拍戲（《喜愛夜蒲》系列），其實嗰陣時都唔知做乜，係佢教我點樣可以做得好啲。」Big Four中張衞健、許志安及蘇永康致祭後接受訪問，張衞健指：「整個Big Four係由Wilson一手開始，應該叫Big Five，如果我哋四個係四肢，佢就係大腦。」許志安表示：「好掛住佢，Wilson係個開心嘅人，我哋會將佢精神延續落去。」而曾和Wilson傳緋聞的姚子羚，更講到喊：「冇佢就冇今日嘅我，好遺憾佢走嗰陣冇同佢道別，相信佢去第二個地方都會帶畀大家開心快樂。」
另曾志偉、古巨基、劉偉強等人送上的花圈都放在前排位置，而周星馳、古天樂、陳曉東、方中信、張家輝、陳慧琳、任達華、薛家燕及鍾欣潼（阿嬌）等都有送花圈致祭。
