有人話娛樂圈人紅就是非多，其實一個人有冇是非，同本身嘅性格都有好大關係，好似公仔箱啲姐仔咁，好多上咗位做一姐之後，身價唔同咗，講句嘢都真係大聲啲，之但係未紅時，又點解都會忽然「大鼻」咗？係咪有人撐腰，大家心照啦！
話說被力捧但演技完全唔掂嘅「聰明女」，自從公開戀情後，原形慢慢浮現，同佢打招呼零反應已經係小事，脾氣仲越嚟越大，基本上化妝師、髮型師同服裝師冇人走得甩，通通都俾佢鬧過，聽某品牌高層講，有次搵聰明女拍平面廣告，諗住路經附近就順便同佢打招呼，點知就畀佢聽到啲唔應該聽到嘅嘢。
高層話嗰日去到遇上聰明女準備換衫，佢就同其他同事企喺換衫房三呎外位置閒談，突然間聽到有人大叫，然後話：「點搞呀，試晒身都錯。」高層嗰刻已都feel到唔適合打招呼，於是即閃，事後聽返同事講，先知聰明女嗰日因為着唔落件衫發脾氣，但服裝同事話件衫其實喺兩星期前已試過，突然唔啱身，唯一原因係聰明女肥咗，試完都冇用。
撰文：Jessie
本欄逢周三刊出
我姐匙縱橫歌影視幕後，多年冷眼旁觀，娛樂圈大小事都走唔過我雙眼，歡迎大家剝花生。
