電話訪問的僱主當中，只得共享單車公司 LocoBike 創辦人程俊豪和童裝公司 Chickeeduck 行政總裁周小龍贊成設法定月事假，而Chickeeduck更早將月事假列為公司政策。原以為這福利較容易在創科公司推行，豈料零售服務業也有實際例子，記者遂造訪Chickeeduck了解。周小龍說，政策推行多年未覺濫用，亦對公司營運無大影響，最重要是「用人勿疑」，與員工保持互信，就毋須擔心。
周小龍的太太是醫生，他亦眼見女兒經期時十分辛苦，同時公司百分之九十幾都是女職員，因此他早就認知女性在月事時有休息需要。周小龍承認，Chickeeduck的員工福利不算標青，年假亦較市場平均水平低，數年前想為員工增加福利，衡量過經營成本，在加年假和月事假之間選了後者。
這項員工政策的執行非常簡單，「你係（需要）嘅話，你打電話返嚟話畀公司聽，咁公司就搵辦法cover你個位囉」，員工毋須提供任何證明，就可為每月的生理不適放一天假。周小龍稱，公司沒有因此聘請額外人手，「喺舖頭盡量調人。周末係難搞㗎喇，但係佢月事要周末嚟就周末嚟㗎啦。當你痛到彎晒腰，你都係坐喺個倉度，不如休息」。
政策實行數年，周小龍未覺得有濫用情況。他強調要「人性化」，不可用捉賊心態看員工的請假狀況。同樣的人性化處理手法，周小龍亦應用在今年的武肺疫潮中；員工有任何輕微病徵，電話通知公司，就可放有薪假，毋須證明，「唔會扣錢，公司信你」。
負責管理公司人力資源的員工 Yuki 表示，寫字樓員工每月有兩至三成人放月事假，前線舖頭員工因放假分不到佣金，請月事假的比例相對較低，每月僅一至兩成，整體對公司營運無影響。她又指，員工們對同事取月事假十分體諒，懂得互相補位，「你上次幫過我，我今次幫返你」。
Yuki 做過空中服務員，又曾在幼稚園上班，兩份工請病假都需要出示醫生紙，空中服務員更有不成文慣例，每逢經期來臨，必定要請病假，導致原本以備不時之需的病假被經期消耗。「公司有月事假，我就唔需要特登去睇醫生。我已經痛得咁辛苦，仲要特登去攞張紙，嚟證明嗰日係病假。其實冇必要。」
有提供月事假的本地企業中，較知名例子有手機應用程式開發公司Innopage。創辦人之一李勁華表示，數年前有飽受經痛困擾的女同事做足資料搜集後，親自向他提案，爭取不用醫生紙的月事假，他立刻跟同事研究，很快落實政策。同事只需短訊或電郵通知公司，每月就可請一日有薪假期，公司亦不問因由。
李勁華認為，月事假沒有令公司蝕底，反而令員工工作效率更好，「如果你（經痛）返咗工，工作效率剩返三成。咁不如你第二日用好啲嘅精神狀態追返，計起上嚟好過你兩日都返工」。他至今不見有濫用情況，每月僅約有四分一員工享用這個假期。
不過這項政策亦有過改變。實行不久，有男同事抗議不公。公司遂改變考慮方向，由女性的生理需要，變成「究竟嗰日適唔適合返工？」政策由女擴展至男，「你相信自己今日休息咗，第二日狀態好啲，會做返今日冇做嘅嘢，咁你就去請啦，我哋唔問」，員工甚至因失戀請假也無妨。
記者質疑，此做法是否矯枉過正？李勁華不同意，「男女都有佢各自嘅需要……男性會劈酒、會睇英超，你又唔會。所以呢樣嘢唔係公唔公平，係我哋以前冇諗，但如果諗清楚，會唔會都benefit到同事，又benefit到公司呢？」
但飽受經期不適困擾的C小姐對男女要在這方面平權不認同，「我哋身體結構唔同，有啲嘢就係你有我冇，我有你冇。男性真係好好彩唔使經歷（經痛）。掉轉頭問返我，我寧願唔放嗰日假，但你唔好叫我M到。係咪先？其實係冇得揀」。