2016年里約奧運開幕禮持旗一幕，「美人魚」歐鎧淳（stephanie）從此不一樣，由單純的水世界跳入璀燦的花花世界，這四年，她既是香港100米背后，亦是《春嬌救志明》的滑板少女，足迹遍佈體育、娛樂版，這位「最美持旗手」曾迷失過、任性過，慶幸一路堅守運動員本份，10月獲頒「十大傑青」，證明腳踏兩個不同世界，也可像28歲的她一步步走出自己新天地。
記者：徐嘉華
攝影：董立華
場地：the wild lot
「我好多時都會諗起2016年開幕禮一幕，會問自己如果唔係持旗手，我會係咩呢？呢四年經歷好戲劇性，你問我想唔想有開幕禮呢件事，話『唔想』實在太虛偽，我好多謝呢一幕。」
四年前，當時24歲的Stephanie長髮披肩，一臉清秀，手持區旗帶領港隊進場，笑容可掬的她被中外傳媒封為「最美持旗手」、「東方維納斯」，從這刻開始被全球人肉搜索，就算不懂體育的人，也認識歐鎧淳，她也不禁說：「以運動員嚟講，我嘅經歷都算好戲劇性。」
就連當選「十大傑青」，也在武肺這一年，Stephanie說：「今年發生好多唔開心事，偏偏我喺呢個時候獲獎，感覺反差好大，我應唔應該開心呢？但同時間唔可以忘記，有啲事可以繼續去做，可以變得更加好。呢個獎對我係一個小小里程碑，希望自己背後嘅小故事能對大家有啟發性。」
Stephanie 是繼方力申及蔡曉慧後第三位獲「傑青」的香港飛魚，亦是小方促成此事，港協副會長霍啟剛當提名人。「冇師兄（方力申）嘅推動，我冇諗過要選，佢認為難得今年係東京奧運年，我又第四次參加奧運，自己心態係游泳生涯已到尾聲，東奧係我最後一屆奧運，等咗八年嘅奧運A標都做到，真係要參選，都想喺今年。」Stephanie認為自己不一樣的運動員路成就這獎項：「2016年奧運持旗後，大家上網一打，就睇到我嘅故事，呢四年嚟，我會做一啲運動員以外嘅事，當初參與一啲商業活動時，有人鬧我點解唔專心做運動員，但我堅持做覺得啱嘅事，亦一直有運動成績去墊底，堅持好重要，因為一唔小心，好易迷失喺娛樂圈呢個『花花世界』。」
經歷一夜成名、廿多歲賺到第一桶金的誘惑，歐鎧淳坦承曾經迷失：「一開始好嚮往拍硬照、影靚相，有一段時間用自己訓練以外休息嘅時間去接job，試過唔想落水，仲會去衡量我練多少，得出嘅成績係咪成正比？好彩我一直記得自己『運動員』身份，一日未退役，我都係運動員，唔應該攞任何尺去量度『游水』，亦好清楚自己嘅價值都係從游水而來，所以幾艱難都會好努力去游。」
「無論靠𠵱家嘅堅持，定細個就認定嘅游水路，我都好多謝以前嘅自己。」Stephanie 的WhatsApp頭像是八歲時手中拿着獎牌的自己：「嗰年比賽喺維園室外池，手上係我嘅第一面牌，亦係最有份量，因為超厚又重，媽咪話我嗰日差啲遲到，去到泳池即刻換泳衣跳入水游50米蛙泳，終於攞到區際第三名，可惜塊獎牌唔見咗。」
「堅持」二字說易行難，歐鎧淳以成績證明自己做得到，近四年每年交出新港績，包括2017年香港世界盃短池賽刷新自己保持的50米背泳港績、2018年雅加達亞運在女子4x100米四式接力賽負責第一棒100米背泳游出1分00秒38新紀錄，2019年新加坡世界盃游出1分00秒22的新港績外，亦第一次達奧運A標（標準是1分00秒25），成奧運「四朝元老」。
物換星移，Stephanie不變的是她對游泳的熱愛，九歲開始跟方力申教練張狄勇練習至今，一直泳學兼優，學生時已獲「傑出少年獎」及「傑出學生獎」，訪問時她仍未拿到含金量最重的「十大傑青」獎座，但相對去年游出的東奧100米背泳A標，後者更顯珍貴：「奧運A標係我專業範疇入面最高水平，2012年已好想達標，等咗八年終於實現，係我努力得來，亦圓滿咗我嘅游泳生涯。」
正常劇情，應該Stephanie開開心心出戰2020東京奧運，然後好好享受運動員生涯尾聲，但偏偏遇上全球大疫情，東奧延期1年至明年7月，屆時她已29歲，談到去年達標後一個贊助商活動，她將自己要游入1分鐘以內的59秒99心願寫在波鞋上，距離她保持的100米背泳港績1分00秒22只差0.23秒：「今年1月去澳洲布里斯班練得好好，同場有20歲澳洲女飛魚Minna Atherton（應屆世錦賽100米背泳銀牌得主）一齊練，進步明顯，以當時top fit狀態，好有信心可以游入一分鐘以下，點知疫情殺到，至今八個幾月未比賽過，再好嘅狀態都冇咗，以我嘅年紀，真係唔知明年狀態會否返到呢個水平，其實呢刻我驚到震。」
回望這四年，Stephanie腳踏兩個不同世界，得多於失：「運動員嘅世界同娛樂圈嘅世界差天共地，運動員唔使諗太多，聽教練指示，游好啲就得，好單純、好有規律，娛樂圈嗰條路，其實行得好辛苦，但冇後悔，佢開咗好多門畀我試，運動員嘅世界太狹窄，若到退役嗰一刻先踏足社會，我會不知所措，希望我嘅例子，可以畀年輕運動員睇到唔同嘅可能性。」
運動員生涯進入倒數，歐鎧淳多得東奧A標圓滿了自己的游泳生涯，亦多謝「十大傑青」來得合時，2020即將過去，「最美持旗手」不忘鼓勵大家：「香港人向來打不死，一定搵到方法重新振作，然後繼續向前行，祝願大家平安渡過2020年。」