以前唔少人都話我，「女仔來講你都算好毒」，全日機不離手，一有新平台出，就第一時間開個戶口先。講玩facebook，我相信我係香港頭嗰批，想當年2006年，同一個外籍朋友吹吹吓水，佢就講到佢家鄉，即係美國，當時好興玩一個平台叫facebook，大約記得佢講過，「 I believe it will be huge and change the world.」雖然我唔知係咩嚟，但都聽佢講登記咗fb。
事隔十幾年，事實證明呢位朋友嘅預言係正確，fb改變全球人類社交模式，影響力大，stakeholder又多，fb在權衡各方利害後，用戶體驗多少都要有妥協。每次顛覆都係一個過程，下一個顛覆社交網絡嘅係唔係新平台MeWe？冇人知，但作為其中一個第一批去MeWe開Page嘅寫字人，暫時聽得比較多嘅論調係：
「以前都有好多新Platform話要挑戰fb，連Google都搞個Google Plus，最後都要收檔啦。鬥唔贏fb㗎啦，妥協啦。」
「MeWe咪又係抄人，佢做大時，遲早咪又係有廣告同演算法。」
「MeWe好多function都未做得好，呢樣唔得嗰樣唔得，privacy又做得廢，冇雙重認證。」
有冇覺得對白好熟口面：
「你鬥唔贏大陸㗎啦，妥協啦。」
「大陸已經好過好多地方㗎啦，你係咪唔用made in China？」
「你移民去第二度會好過香港咩，英國啲人咪又係唔戴口罩、台灣經濟咁差……」
呢啲都係真，咁點解又咁多人會移民？
你話純睇功能，MeWe真係差太遠，但用功能去批判今次網絡移民潮，未免捉錯用神。香港人近一年半，對「言論被禁」呢四個字已成為驚弓之鳥，喺透明度極低嘅演算法面前，要搵一個fb以外plan B。
我唔係特別討厭fb，但同時經營多一個MeWe，只係確保就算Page有咩事都好，我都有一個同大家暢所欲言嘅渠道。呢篇文出咗街，希望唔會有人話，「你分化，你係鬼」。
千頌C