公民黨「飛機師」譚文豪同民主派立法會議員一齊總辭之後，冇停手繼續用行動顯示抗爭決心，加入黃色經濟圈轉戰飲食界，同黨友Gordon林瑞華喺旺角開咗間茶記「一日三餐」，雖然茶餐廳啱啱開門試業，已經客似雲來，仲有唔少民主派政界名人齊齊幫襯打卡。
公民黨兩位前高層、前主席余若薇同前黨魁楊岳橋噚日就約埋去「一日三餐」食好西，仲同譚文豪影咗張合照。喺限聚令之下只可以兩人一枱，八方見余大狀同AY兩個要分枱坐，點解嘅？睇真啲，原來飛機師身後有位神秘男士，唔通係余大狀老公？
不過佢哋就唔夠口福啦，因為菠蘿包已經賣晒，唔知係咪一日三餐嘅鎮店美食呢？再睇余大狀facebook，原來佢一連兩日過海幫襯一日三餐，仲大讚羅宋湯，話令佢諗起當年讀港大年代成日幫襯嘅西營盤般含道俄國扒房莎厘娜餐廳（Czarina），可惜呢間有50年歷史嘅「港大飯堂」2013年時因為租金問題結業。