許姓前立法會議員逃亡海外，發現在香港多間銀行的個人戶口和家人戶口統統被凍結，事件見報翌日警方PK蛇指當事人涉嫌犯國安法和洗黑錢，正在追查證據云云，誰不知兩小時後滙豐又忽然自動解凍。嘩，乜家陣啲銀行兒戲到咁，中意封就封中意解就解，五時花六時變，市民嚇到個心集體離一離，紛紛研究如何為自己的儲蓄尋找安全門。咦，怪唔之得先幾日粉紅色物體揚言出糧收現金啦，原來曲線提醒大家銀行靠唔住，真係用心良苦，可惜忠言逆耳，沒有人領略福音的深層意義，立即租貨車搬運存款返屋企，臨急抱佛腳搞到生蝦咁跳。哈，咪話我牙擦擦，雖然成世人不善理財，這回卻非常知機，早在半年前趁巴黎封城冇街去，已經密謀走資，透過網上理財將血汗錢從香港移到冇咁牙煙的地帶。當時朋友見狀，群起嘲笑基伯好驚唔驚，甲話「黐L線，有乜理由無情情凍結資產」，乙講「onX9，你估你係邊個，連黎老闆都出入平安，點會搞你啲無名氏」，呢嗱，輪都輪到我叻噃一次嘞啩？
現在這種完全撕破臉皮的時勢，莫講話拉人封艇不需要理由，就算破例做門面工夫列出罪狀，你以為有困難嗎？最方便的「嫖妓」大概不會扣在我頭上（又再證明高調出櫃只有好處沒有壞處，通街知你搞基，冇得屈你坐洗頭艇北上叫雞），含糊的「勾結外國勢力」恐怕也捉不到痛腳，但要告我「勾搭外國勢力」就易過借火，派個特工尾隨影相，東京新宿橫巷拋的媚眼，巴黎塞納河畔拋的生藕，甚至希臘米可諾斯海灘拋的胸，全部有圖有真相，走都走唔甩。