今年香港電影業多災多難，電影院再次暫停營業，本月初鮮浪潮主辦的大型放映活動：劉家良傑作展被迫延期，非常可惜。劉家良乃港產功夫電影一代宗師，其作品全部銅橋鐵馬，剛柔逼直，非雜耍及花拳繡腿，所以好睇。本周冇新片可評，小弟又講吓「香港倒後鏡」：劉家良之逸事。此古仔乃70年代《明報》娛樂版金牌專欄作家阿吉（已故的林冰女士）所寫的。
先介紹林冰。林冰原名林美年，筆名阿吉，早年由廣州來港，1964年晉身報界跑娛樂新聞。由於文筆風趣，讀者追捧，很快便成為當年娛樂版四大名記之一（其他三人為李茵、夏雪及張顰）。70年代林冰炙手可熱，除了當記者之外，她亦是邵氏電影宣傳大員，天天在報章上寫邵氏幕前幕後之逸聞，為六叔旗下一眾大小明星開路。其文章特色：富幽默感，謔而不虐，寫人物性格細膩，如躍然紙上。
當年我是初中生，很迷電影，每天讀報，必先追看阿吉之專欄。印象最深刻的數篇，是她調侃功夫大師劉家良之文章。阿吉寫劉家良英文「水皮」，經常說些「唔鹹唔淡」的港式拼音英語，鬧出不少笑話。如某天劉師傅到尖沙嘴大酒店喝下午茶，向服務員點「屙爛豬屎」。侍應莫名其妙，搞了半天才明白是orange juice。阿吉行文啜核抵死，令人捧腹，笑到碌地。
小弟由60年代讀報至今，老人癡呆未達標，記性好，所以又想起劉家良另一趣事。話說劉師父1978年拍《少林三十六房》票房大賣，之後成為邵氏重臣。佢每半年定期扭計一次要求加人工，搞到邵逸夫極之頭痛，怕咗佢先怕米貴。當年邵氏片場名車多不勝數，邵爵士有很多部碌死老鼠。一天，劉師父見獵心喜，又想整番部威下，於是去問爵士可否轉賣一部二手貨。爵士二話不說，送部二手嘢給劉師父，但條件有二。一：不可轉賣；二：不可請司機，一定要自己開車。劉師父當然大樂，但得車後自己開車，卻變為邵氏笑譚。原因是劉家良雖然功夫了得，但身材矮小，自己開碌死老鼠，唔似老闆反似司機。原本想「八面威風」，卻變似「落拓寒鶴」。
阿吉文章絕妙過癮，可惜已成絕唱。今時今日娛樂版寫稿佬，冇人有咁嘅功力。劉家良亦然，佢嘅電影全部真功夫，冇得頂，無人能及，無以為繼。
撰文：區紹熙
本欄逢周二刊出
超級戲迷，嬉笑怒罵品評新片。漫步影壇細說從頭。著有《港產片真巴閉》一書。
