《南華早報》日前報道，有班行走中環嘅「新香港人」，包括身兼全國政協委員嘅瑞信董事李山等，今年5月底低調成立「紫荊黨」，想招募25萬黨員，前立法會議員朱凱廸形容係中共地下黨浮面，直接管治香港。有民主派中人指，𠵱家香港人喺林鄭治下，同被中共直接管冇乜大分別，反而建制派要驚北京係咪搵班「新香港人」取代佢哋，將佢哋用完即棄。
呢個紫荊黨核心除咗李山，仲有中國移動多媒體廣播控股有限公司主席黃秋智以及卓悅主席陳健文，強調新政黨成立要成為一國兩制嘅堅定擁護者，仲提出大堆改革建議，似係威係勢。前立法會議員朱凱廸前日喺社交媒站發帖，話從紫荊黨目標招募25萬黨員呢個驚人數目而言，「情況可能不是以新組織取代舊組織，反而更似是直接將香港的地下共產黨組織浮面，繼而建立與大陸相匹配的黨委管治制度」。
睇返成立近30年嘅民建聯，25萬係佢哋四萬黨員人數嘅六倍，如果數字冇作大或者隨口噏，阿廸話唯一可以建立到呢個規模黨組織嘅方法，就係直接將潛伏喺香港嘅中共地下黨員浮面，喺國安法時代建立一黨獨大嘅政治組織，同大陸正式睇齊，覺得未來可能唔係紫荊黨同民建聯內鬥，而係民建聯被併入紫荊黨，由中聯辦領導嘅香港黨委系統全面成形。民主派中人話，北京已經打殘民主派力量，一直用嚟平衡民主派嘅建制派亦冇存在價值，「到時呢班新香港人一定拎晒功能組別先，因為最易拎，咁經民聯、自由黨應該係最先摺埋嘅建制派」。
李八方