港口城市嘅頭號殺手，係內陸政權。自大航海時代開始，由歐洲勢力開埠嘅亞洲港口城市，有冇其他例子內陸吞噬港市嘅例子？
有，大把。
第二次世界大戰之後，歐洲勢力，尤其是大英帝國，開始退場，走向和平瓦解。亞洲地方，經歷完日本佔領，發覺英國軍事力量已經見底。民族國家興起嘅熱潮，傳到嚟亞洲。
歐帝退場，內陸崛起，一來一回，於是港口城市進入最後倒數。
喺中國，早喺國民黨北伐之後，二戰完結之前，條約港同租界，全部移交畀內陸政黨統治，上海拜拜。
二戰後，印度建國。甘地提倡反貿易，搞自給自足嘅農業經濟，佢其中一張最出名嘅相，係佢喺度織布，身先士卒，罷買英國貨。
於是乎，Bombay、Madras等等被溶咗入新印度國嘅計劃經濟裏面。而Calcutta，曾經嘅英國印度公司同英國殖民政府嘅亞洲總部，被「去貿易化」同「去工業化」。今時今日，好多人對Calcutta嘅印象，只係喺呢個悲慘城市，曾經有位加爾各答天使叫德蘭修女。
印度之外，仲有印尼建國，同埋馬來西亞建國。馬來西亞半島，本來有四個英治港口城市，包括新加坡、Malacca、Penang同Dinding。有趣嘅係，呢四個地方，地理上互不相連，但係就當一個地方管治，都係屬於Straits settlements，唔少港督，例如金文泰、葛量洪，嚟香港前後，都喺呢度返過工。
英帝趕住退場，拉攏呢四個地方，加入新馬來亞國。檳城商人驚青，打國際線，希望自決留英，或者孖住新加坡。英國政府為咗平息，話馬來亞政府，會保證檳城繼續係自由港，馬照跑舞照跳。最後檳城自決運動唔成氣候，檳城加入馬來亞。
自由港呢？十年之後一日，馬來西亞政府，突然宣佈，冇喇，冇自由港喇。當呢邊廂檳城brain drain，嗰邊廂，俾馬來亞踢出嚟獨立成國嘅新加坡，繼續自由港。
即係，其實二戰之後，內陸吞噬港市，先係常態。我哋熟悉嘅新加坡同香港，能夠繼續擺脫內陸化，先至係例外，而且係僅有嘅例外。新加坡獨立成國，香港就續命續到1997，另加鄧小平同志拍心口嘅50年回贈。
社會學冇完美實驗，新加坡vs檳城，香港vs上海，大概係不完美實驗裏面，最近磅嘅兩啤，而實驗嘅結果，顯然易見。
雖然英國保護到香港嘅way of life，去到1997。但其實英國嘅保護力量，好多年前就出現裂痕。1920年代，金文泰提議將新界由租轉割，英國外交部就已經話唔好搞咁多嘢。二戰之後，蔣介石要求移交香港，完成佢最後一塊砌圖，結果要靠美國總統出面撐，英國先保得住香港。
到咗1952，當葛量洪提出逐步民主，倫敦又話呀邊個邊個唔鍾意，多一事不如少一事。1984中英談判，香港人冇得參與，英國談判代表柯理達，開口叫香港人唔好天真。一次又一次，港督為香港爭取大動作，都係俾驚中國嬲嬲嘅倫敦ban返轉頭。
隨住香港嘅續命回贈被走數，大航海時代亞洲篇，亦嚟到最終章。內陸化終於殺到香港，但同二戰後亞洲港市嗰浸相比，情況又有啲唔同。
第一，呢一次，一個係曾經長期高踞自由指數排行榜港口城市，另一個就將電子獨裁主義玩到佢認第二冇人敢認第一龐大政權。兩者嘅反差，係咁多例子之中最大，亦都冇乜可能更大。香港嘅形勢，因此更加惡劣。
但另一方面，今日嘅世界形勢，同二戰後又好唔同。當年民族主義、反帝反殖係世界潮流，加上冷戰策略計算關係，港口城市唔容易得到自由世界支持。而且就算係中國，由當年傾取消租界嘅國民黨，到到香港前途談判嘅鄧小平韜光養晦時代，都遠遠唔及中國今日咁，喺國際上犯眾憎。
相反，今日大勢係天下圍中，而喺呢個背景下，香港比起之前嘅港口城市，更加清晰、更加堅決咁向國際展示反抗嘅意志，令到全個自由世界冇人懷疑，香港人會唔會其實對內陸化好受落，好想被溶入大灣區。香港人發出過嘅聲音，唔會被抹得走。
以上分別，令到香港嘅逃生路徑，多過二戰後嘅其他同類城市，但足唔足以令香港擺脫亞洲殖民港口嘅宿命？
撰文：宋漢生
fb : sunghsblog