疫情嚴峻，政府恢復二人限聚令，食肆叫苦，左丁山與老友在餐廳食午飯，只見枱多人少，夥計冇心機，部長無表情，老闆每日打開門就慘蝕，如此慘淡情景，都唔知可以維持到幾耐。
呢日上到陸羽，四人分兩張枱坐低，隔枱分點心炒麵而食，唔係幾有癮，然後睇到另有食客打開蘋果日報睇頭版之黎智英被拒保釋，還柙至明年四月嘅新聞，一面睇一面念念有辭，最後低呼一聲「冇天理」，左丁山更加心情鬱悶，四十年來在陸羽飲茶，呢一次最是低氣壓，所謂「欺詐」案，竟動用國安法法官審理，又竟然可以推後四個幾月再審，其間不准保釋，確是沒有道理，「欺詐」也者，據案情內容，頂多係租務糾紛，處事不合乎租約條款一類，香港每日不知有幾多宗，駛唔駛咁大陣仗呀？
飲完茶行街，行行吓諗起台灣雷震案，當年年紀小，還未入讀中學。要入咗中大之後開始學人讀殷海光，先至知道有雷震案之事，已記憶模糊。好在現今科技先進，急忙返回寫字房上網一查，即時搵到不少資料：1960年9月4日，「自由中國」雜誌之總編雷震以「涉嫌包庇匪諜、知情不報，並連續以文字為有利於叛徒之宣情，被軍事法庭判處十年有期徒刑」，胡適回到台灣後，與蔣介石見面為雷震說話，蔣介石說到胡適好像相信雷震，不相信政府！後來國防部覆判，蔣介石親自批至少維持十年刑期。胡適在1961年7月26日為雷震65歲生日親筆抄下南宋詩人楊萬里七言絕詩「桂源鋪」送給雷震，詩云：「萬山不許一溪奔，攔得溪聲日夜喧。到得前頭山腳盡，堂堂溪水出前村」。胡適無力為雷震爭取免刑，以「桂源鋪」為老友慶生，自然是肯定雷震爭取言論自由及民主方面的努力。
肥佬黎在12月8日邁入73歲之年，想不到不能與家人及朋友慶祝生辰、聖誕及農曆新年，判還柙四個月，有人諗得好絕！左丁山與肥佬黎自1986年在馬會壁球場相識，介紹人係一位已故中學同學，之後去佢大宅食飯，知道佢完全係受到89六四嘅刺激，先至發願要搞雜誌，1990年創辦壹週刊，後辦蘋果日報，至今30年，如今可能步雷震後塵入獄，悲乎！