亞冠盃踏入淘汰賽階段，形勢開始緊湊，FC北京就先淘汰咗FC東京，睇到北京出戰亞冠盃嘅心態，明顯比其餘幾支中超球隊好，暫時可以正面評級，有咩心水遲啲再講，今日主戰場返去日本先。
因為武肺疫情而改制，2020年球季嘅日職同日乙都會「有升班、冇降班」，即係話已經冇護級壓力，所以季尾見到類似中下游球隊嘅比賽，真係擁住一顆「大」嘅心去投資就OK。先講星期三場日職先，柏雷素爾（圖）主場對大分三神，柏雷素爾攻力真係好勁，今季已經累積攻入56球，只少過兩支新舊冠軍川崎前鋒同橫濱水手。要爭前三位就冇乜可能，餘下目標就係刷靚個數據，谷到上平均每場入到兩球，就真係好叻仔。上場遇到全日職最守得嘅名古屋鯨魚，入唔到波輸0:1，隔一隔開番口「細」，以大分上仗對仙台維加泰都輸兩粒，馬會柏雷就讓半/一，放心捧上盤加「大」。
星期三仲有一場日乙，由FC愛媛主場對甲府風林，甲府風林上仗輸俾千葉市原，爭升班連數字機會都冇埋，球隊一定散晒，雖然FC愛媛排到尾二，又唔使降班，但嚟到季尾，日本仔要向球迷交代，主隊愛媛一定要攞尾彩，誓不包尾，所以甲府初盤讓半球，唔使諗一定要下盤，另外愛媛成季都失波好多，相信都保持到，所以大大力轟埋去「大」度。
文：黃耀富
截稿前馬會尚未開盤，盤口僅供參考，讀者記得留意足智彩網頁。
