季初脫腳嘅西甲豪門巴塞隆拿，上周中歐聯畀王牌美斯休息，等佢喺上禮拜六領軍作客「升班馬」卡迪斯。原本以為有球王壓陣可以輕鬆贏一場，點知因為後防兩次派膠，居然以1:2輸波收場。反之上周中歐聯贏唔到嘅馬德里雙雄都反彈，其中皇家馬德里小勝西維爾，令教頭施丹鬆口氣，馬德里體育會亦以2:0擊敗華拉度列，賽後10戰得14分嘅巴塞，落後馬體會12分咁多，距離降班區仲只得三分差距，係巴塞近33年最差嘅開季！
賽前巴塞三連勝兼冇失波，貌似重回正軌，美斯上場西甲仲射入靚波向過咗身嘅馬勒當拿致敬。點知今場開波只係八分鐘，卡迪斯左路角球傳中，巴塞21歲年輕後衞明古沙竟然解圍變攻門，門將達史特根雖然已經飛身撲走，但龍門口仲有個卡迪斯前鋒艾華路基文尼斯補中，幫主隊領先1:0。
之後巴塞起勢咁攻，美斯仲不斷鋪橋搭路，可惜隊友巴夫韋迪、基沙文等不停浪費機會，結果半場落後1球嘅巴塞去到57分鐘，先由美斯致命傳送畀左路空位嘅佐迪艾巴，後者禁區內嘅傳中省中對方後衞喺近柱彈入，幫巴塞追成1:1。點知巴塞後防轉頭又唔爭氣，63分鐘將個波踢入自己禁區，中堅基文迪朗格勒同達史特根都遲遲唔解圍，結果後備上陣只係43秒嘅老牌前鋒尼格度逼甩個波射入空門。美斯今場就算幾努力，全場射咗10腳同9次過人，都冇辦法幫巴塞平反敗局，眼白白睇住巴塞輸1:2，距離降班區（3分）仲近過榜首（12分，未計周日賽果）。
賽後巴塞教練朗奴高文梗係嬲到爆，鬧爆球員態度有問題：「輸波真係好難解釋，上半場係踢得唔好，下半場我哋表現好啲，但輸波方式實在好難令人相信，全部係因為一啲預計唔到、唔容許出現嘅失誤，呢個好明顯係由於冇集中力搞到咁，球員態度唔好，唔單止淨係防線。」
反之宿敵皇馬同日作客西維爾就大打翻身仗，靠雲尼斯奧斯祖利亞喺55分鐘接應傳中掃射，個波撞到西維爾門將耶辛尼保奴改變方向入網，結果皇馬憑呢球烏龍小勝1:0，令歐聯出線陷入危機嘅皇馬同教練施丹，暫時都叫鬆一口氣，睇吓周三對慕遜加柏場生死戰，呢位光頭主帥可唔可以再乘勢逃出生天。