【本報訊】從事極高端「私人保險」業務的盧啟賢（Calvin），因與藝人廖碧兒拍拖而開始曝光，現時他為人壽保險經紀公司R.E. Lee International（亞溢利國際）行政總裁，接受專訪時指超級富豪對保險及遺產規劃需求強勁。
一般大眾或未聞此公司，但富豪界不會陌生，盧謂：「我哋專做高額人壽保單，呢啲保額普遍超過2,000萬、甚至1至2億美金（約15.6億港元）；目標客戶係各地Top 50 families （頭50大家族），幫佢哋做Estate planning （遺產規劃）。」
「大部份高資產客戶都面對財富傳承問題，普通人投保100萬美金已經好大額，但對某一撮人嚟講仍然唔夠。」盧啟賢解釋，旗下客戶資產在世界各地，惟各地稅率不同，「例如美國有40%遺產稅、日本係70%，唔準備定筆現金交稅，呢份財產三個generations已經冇咗。100蚊遺產，我哋係透過買70蚊嘅人壽保險去cover tax」。
承保公司來自熟悉的保險公司品牌，曾有保單以「Buy-sell Agreement」操作，「係一間國際企業幫主席投保，一旦有事，份保單用嚟cover公司股價半日跌幅，單計保費都幾億美金」；保險公司基於風險考慮，通常不易承保過億元保單，而「私人保險」經紀正是代表富豪與保險公司周旋。盧啟賢指每張保單都是要度身訂造。
「（保險公司）通常只擔心兩大風險：當地戰亂同投保人健康，但講真我啲客有咩事，可能少少感冒，已經第一時間飛去美國；基本上解釋到上述兩個風險，保險公司都會考慮承保。 」富豪保險講求人脈，加拿大成長的盧啟賢年逾40歲，母親李佩珍是保險界翹楚，回港後他加入與母親有長久合作、公司已故主席Robert E. Lee創立的人壽保險經紀公司。根據資料，公司總部位於香港，分別於新加坡、杜拜、上海、美國西雅圖等地有分部；Robert E. Lee自1954年於美國開始人壽保險業務，1979年在港開設辦事處。
疫情下全球健康危機意識升溫，盧啟賢指港區代理保單今年是record year（破紀錄），但未有透露保額數目。