隨Mox宣佈唔支援4間銀行電子直接付款授權（eDDA）過數，虛銀就eDDA的抗爭也算是進入最終章。
簡單講，eDDA係喺「轉數快」系統上的一項轉賬服務，方便用戶在自己個banking app發起轉賬，由其他戶口轉錢入自己戶口，全程唔需要離開個app，大額轉賬一樣得。
回帶至今年6月，即係虛銀開業正式營業後數月，傳出滙豐為首的傳統銀行向虛銀收取高達2%手續費，一啲都唔mild，虛銀各自同滙豐等大行拗數，金管局不干預，銀公溫馨提示後，都搞唔掂！
近日Mox率先宣告放棄，唔用滙豐、恒生、中銀、大新銀行eDDA轉賬服務。
節錄《蘋果日報》周五報道，「傳統銀行向虛擬銀行收取電子直接付款授權（eDDA）服務費用，雙方磋商似乎觸礁，面對死線逼近，虛銀Mox Bank率先發電郵通知客戶，將移除滙豐、恒生、中銀、大新銀行eDDA轉賬服務，原因是有關銀行將會對使用此轉錢方法的資金收取費用」。
以滙豐為首的傳統銀行角度出發，這是一場「捍衞戰」，而虛銀則以普惠金融為名，「出師」爭取，不過，在商業原則下無分對錯。傳統銀行企硬不讓分毫，虛銀放棄另求其他途徑，商業世界複雜得嚟，卻比任何情況都來得簡單，協商不成也未至於生死存亡。
相比起虛銀的商業紛爭，相信大家更關注香港其他大事，令人沮喪的新聞接二連三出現：眾志三子被重判入獄；有線新聞派大信封，40名新聞從業員被裁，《新聞刺針》慘被殺組，及後引發中國組總辭，其他部組亦有人遞信以示不滿；周四《蘋果日報》多位高層被控欺詐罪，創辦人黎智英被指潛逃風險高，不准保釋，需還柙至明年4月再訊；民主派許志峯宣佈流亡，家人及其銀行戶口全被凍結，真正的留島留錢不留人。
佢哋又做錯咗啲咩？面對政權，若不退讓、低頭，後果難以想像，他們的承擔正是令人佩服的原因。
杜夫人