美國大選期間facebook經常政治審查，呢股「歪風」最近吹到香港，facebook封咗多達12萬粉絲嘅「Tai Po大埔」群組，唔知係咪封開有鋪癮，封完黃絲群組，連藍絲專頁「SaveHK」都移除埋，搞到藍絲好嬲，最離奇係，好多藍絲KOL趁機食藍血饅頭，開新page搶客吸like，連民建聯都出嚟幫個專頁「指揮交通」，叫人去民建聯微信公眾號以免「失聯」！究竟民建聯同SaveHK有乜關係，定係想搶客？
話說SaveHK被fb移除後，民建聯喺fb出po，話為避免同大家一夜失聯，請立即關注「民建聯 香港」微信公眾號，並轉發到朋友圈，有人質疑民建聯同SaveHK嘅關係，又懷疑佢哋想搶客。另外，成日叫人唔好cap圖嘅藍絲「玻璃朱」朱庭萱突然殺出，話「我從來都唔建議大家入SaveHK！」話因為專頁滲入咗好多「黃絲曱甴」，趁早加入佢開設嘅「LoveHK」喎。雖然玻璃朱叫人「切勿cap圖外傳」，但人類總係犯相同嘅錯，秒速被人cap圖放上SaveHK公審，質疑玻璃朱係咪要鬥藍搞分化。
強帖留名，唔止八方，好多連登仔都食到一地花生，場罵戰雖然喺秘密群組發生，但不停有對話被cap圖。連上年藝人喺警總打卡張相都被放上網，似乎有玻璃朱嘅地方就有cap圖流出，八方只能說句，貴圈真亂。
李八方