就香港舞台藝術從業員工會舉行記者會，《蘋果》昨日致電舞台劇演員及導演甄詠蓓問其看法，甄詠蓓表示同意工會意見，她說：「例如講到政府建議劇團轉喺網上播出，但有好大限制，而且要技術同經濟上支援，所以政府應該幫手。」甄詠蓓指業界在這一年已經用盡方法去應對，做得好叻，有製作公司更「齊上齊落」，因應演出場數收取酬金，但現時情況嚴峻，進入油盡燈枯境界，應該是政府主動出手幫手的時候，她說：「首先當然係經濟補助，而我哋本身有好多自由工作者，其實可以透過各種組織去現金資助佢哋，例如後台工作人員協會、香港戲劇協會等，又或者靠之前功能組別投票嘅人去認證，咁就唔怕重複。」
甄詠蓓又指出其實在資助劇團方面，政府可以想想辦法，「唔好一刀切血本無歸，例如可以根據劇團嘅籌備係進入前期定後期、準備咗佈景就賠幾多、服裝就賠幾多，或者係演出中又賠多啲，如果演出一半就賠一個百分比。」甄詠蓓講講吓更帶點激動說：「𠵱家已經係政府主動理解幫助業界嘅時候，其實如果唔係啲人坐喺office度做乜呢？其中包括康文署、藝術發展局、民政局局長、立法會議員，馬逢國唔好等啲人死晒，先喺度嗌，嗰陣時已經幫唔到。唔好坐喺個辦公室諗我哋有啲乜嘢問題，而係應該約啲劇團出嚟傾！」