阿根廷球王馬勒當拿上個月底因心臟病發離世，終年60歲，佢曾經效力嘅意甲球隊拿玻里為咗向呢位傳奇致敬，上禮拜五起主場正式改名做馬勒當拿球場（圖）。馬勒當拿曾經喺1984至1991年間效力拿玻里，仲幫過呢支南部球隊贏過兩次意甲冠軍，自此就成為咗那不勒斯嘅英雄。老馬去世後，那不勒斯市長同拿玻里班主已經提議，要用馬勒當拿個名嚟命名主場館。上禮拜五喺那不勒斯市議會批准下，將主場聖保羅球場正式改名做馬勒當拿球場。市議會嘅聲明指出，提議得到議員們嘅一致同意，更指老馬為拿玻里歷史性贏過兩次意甲同其他冠軍，佢應該得到成個城市永恆而且無條件嘅愛。而球場改名後嘅首戰，將係下禮拜四歐霸盃對皇家蘇斯達嘅最後一輪分組賽。