【本報訊】月圓月缺有時，一年下來，抗暴戰線一條又一條如潮退深埋大海，在反送中運動期間公開警察個人資料的Telegram頻道「老豆搵仔」亦如是。團隊代表John（化名）認為，運動已達成「局部攬炒」，可惜光復的理想卻越見渺茫，他和成員均曾深受負面情緒困擾，希望同路人能互相扶持，把握抗爭退潮期治療自己。不過成員未放棄抗爭，正籌備其他項目，助港人繼續與中共對抗。
雖然受到警方多次阻撓，「老豆搵仔」頻道至今仍然運作，目前有逾18萬人訂閱。頻道管理員仍定時公佈警察的個人資料，由身份證號碼、伴侶照片、社交媒體賬號等一目了然。「老豆搵仔」頻道亦設有報料連結，讓網民投稿。
「老豆搵仔」代表John稱，頻道公開的資料大多數來自警察的身邊人，「有試過係個仔報佢老豆啲個人資料……而報咗出嚟對佢嚟講唔係大事，又唔係要攞刀隊冧佢老豆。」John稱，團隊成員並非專業「起底」，多是「邊做邊學」，起初亦無預計當局會千方百計阻撓。
港版國安法通過近半年，John認為已經達成「局部攬炒」，「香港嘅國際金融地位開始下降，信貸評級又開始下降……我哋已經撼動到中共」。不過，縱使「攬炒」目標已達成，「光復香港」的理想卻越見渺茫，「老豆搵仔」各成員都曾站在抗爭前線，接觸過不同身份的抗爭者，甚至目睹戰友陸續犧牲，「好可悲嘅係，我哋會慢慢習慣呢件事—『哦，又有人好耐冇online，係咪又俾人拉咗？』」John指出，團隊內各成員均曾陷入情緒低谷，他本人亦曾深受抑鬱症困擾。
「做『老豆搵仔』其實好悲痛……嗰段時間好難過，好似永遠留咗喺17號、18號、19號嘅理大咁。」John在理大圍城後一度無法走出陰影，幸得友人陪伴方逐漸恢復。在治療自己情緒期間，接觸到流亡法國的捷克作家米蘭昆德拉的作品，相似的背景讓他找到慰藉，「睇書可以令你用第二個角度，去睇返你以往經歷嘅一切」。
港府打壓加上疫症當前，不論和理非抑或勇武，抗爭活動已不復當年勇。John寄語港人趁此空檔處理個人思緒，好好消化過去發生的事，同時誠實面對和接受過去，「而唔係用一啲好荒謬嘅手法……唔好矮化敵人，因為事實上敵人係好強……有好多嘢係好難接受，但我哋都係要接受佢」。至於是否繼續抗爭，John說各人自有決定，寄望同路人互相扶持，在這段時間好好照顧自己。
John亦透露，他和其他身在異鄉的「老豆搵仔」成員，正在籌備其他項目，希望能夠協助香港人自強，讓大家能夠與中共一戰。
