南韓嘅水原藍翼上禮拜五喺亞冠盃G組最後一戰，以2:0贏咗日職球隊神戶勝利船後，以較佳得球力壓廣州恒大出線16強，意味住呢支中超富豪球會近10年嚟首次四大皆空（見附表）。恒大上禮拜六凌晨就即刻做嘢，宣佈將隊長鄭智升做球會總經理，騎住總教練簡拿華路，呢種咁有「中國特色」嘅任命，擺明就係要逼走大簡。
恒大今季喺中超總決賽輸咗畀江蘇蘇寧，宣告衞冕失敗，最近又喺足協盃因為被迫派出預備組球員出戰，結果喺16強止步，加埋上禮拜五喺亞冠分組賽出局，令佢哋連今季最後嘅捧盃機會都冇埋，近10年第一次成季食白果，身為教練嘅大簡當然要「孭鑊」。恒大上禮拜六凌晨出咗兩份聲明，首先係宣佈球隊會由「董事長領導主教練負責制」，改為「董事長領導總經理負責制」，更戲劇性嘅係，佢哋隨後公佈嘅總經理人選，竟然係因傷冇去到多哈參賽嘅老將鄭智。
今年40歲嘅鄭智，同恒大份球員合約今年就會屆滿，佢之前已經被安插入去大簡嘅教練團，好聽啲咪叫幫手囉，但真正目的係乜就要佢哋班高層自己先知。到𠵱家四大皆空，恒大就即刻露出真面目，透過改動編制，令鄭智忽然變成大簡嘅直屬上司，輕鬆將佢架空。有報道指大簡喺恒大出局之後，並冇隨隊返中國，反而直接返咗老家意大利放假，唔少球迷揣測究竟恒大下季仲會唔會係由大簡揸旗。
事實上，今次亦唔係大簡第一次喺恒大俾人批鬥，佢舊年就曾因為球隊表現跌watt而被短暫停職，仲要參加球會嘅企業文化學習班，而當時代替佢帶隊嘅正正就係鄭智。雖然接受完「再教育」冇耐就有得復職，但呢次風波對簡拿華路嘅影響都咪話唔大。簡拿華路喺球員時代出名硬朗兼頂得，但賺咗咁耐人民幣，家吓佢都學乖晒，之前仲大讚作為武漢肺炎源頭輸出國嘅中國防疫出色，值得全世界學習。不過，𠵱家已經俾恒大同鄭智踩到上頭頂，簡拿華路仲忍到幾耐，真係要拭目以待。
