人愈大，顧慮愈多，包袱愈重。
尤其作為一家之主，有兒有女有老婆，肩頭更有千斤重。
每個決定，一切考量，俱以穩陣為出發點。就像隻老船，最好泊在舒適港，無風無浪到永遠。
然而，船泊在港，還是船嗎？中環海味店老闆森哥，就有副不畏風浪的性格。
五十歲人，放棄穩定工作，扛着一家生計，帶着年幼子女，義無反顧，盡地一煲，創業再出發。
「博吓囉！博唔到咪去打工囉！點知一做就做咗二十幾年。」森哥瀟灑地說。
廿年轉眼過，老船還在波濤洶湧的大海中打拼，
沒有絲毫老態，乘風破浪，勇往直前，愈拼愈有勁。
只因他有個信念：船不是為了停泊而生，是為了啟航。
初秋氣溫未有回落。午後中環，陽光灑落大廈外窗，反射到大街上，一閃一閃亮金光。沿着威靈頓街直走，轉角迎來一間海味店，一排一排花膠，也閃着金光，中間懸掛着黑金色的木牌匾—明都森記。這個金黃色國度，一直由老闆關洛森打理。貨架乾淨企理，一切井井有條。高高的樓底，花膠滿佈每個角落，四周的櫃子、天花的橫樑、閣樓上、大門前，人在其中，像被花膠包圍，空氣中的淡淡鹹香，告訴大家，這是一股屬於海的味道。店正中央，放着陳舊四方木枱，這是店的心臟，是一家人用膳的餐桌，也是招呼客人朋友的地方。「老婆每朝十點左右就買餸返嚟煮飯，我哋日日都喺呢度食晏。」平淡是福，他微笑着。架着眼鏡的森哥雙眼炯炯有神，說話中氣十足，身手靈活。即使要搬搬抬抬，也難不倒他，誰猜到他已屆七十。過去二十年，他每朝八點開門，理貨顧店一腳踢。連攞貨都靠自己，從不假手於人，「我自己日日推部車去睇貨，幾十年如一日，咁自己仲有氣有力，邊使請個人幫手呀！」習慣成自然，日復日，不間斷。
由中環走到西環，雖則路程不算遠，可是貴為老闆，且年紀「有番咁上下」，大可以要求店家安排送貨，「我從來都唔叫貨！」森哥嚴肅起來，「我信我自己眼光囉！每次都自己落去揀貨，揀最好嘅。」只要關乎到品質，必須認真看待。店內所有產品，貴價如花膠，廉價如蝦米，都經他精挑細選，絕不欺場。「咁你入得啲貨，要交得到畀客人㗎嘛！」堅持，只因為要客人買得安心。難怪連明星也捧場，「周星馳專食花膠，消夜嘅啫，佢阿媽就過嚟買嘅；周潤發阿媽呢，就食日本遼參，佢食親都係靚嘅！」
待客之道，在於真誠。他從不拒人於千里，經常主動邀請客人坐下閒聊，無幫襯也不相干。訪問當日，幫襯幾十年的陶瓷老闆來訪，談談笑笑，也沒理會幫襯不幫襯。「咁多年嚟喺老闆呢度使咗唔少錢啦！」大家又笑一餐。附近的街坊街里早成朋友，有熟客更加會邀約飲早茶。「我喺中環四十年啦！個個街坊都識，有邊個唔識啫！（我是）明都老闆吖嘛！」森哥興奮說道。也難怪，年輕時由大陸來港，跟着爸爸入行做酒樓時，工作地點是中環。之後到鄉里的海味店打工六七年，又在中環。直到2000年自己創業，都選中環。而且自店舖開業後，雖然位置搬了四次，卻仍然留在同一區。走不遠，離不開。第一間在嘉咸街街市，那時候的他，因打了六七年海味店工，磨練了眼光，累積了人脈，欲試水溫，就戰戰兢兢的，跟別人合租一個舖位創業。
數年過去，適逢街市重建，趁着生意搞得有聲有色，他就一下子搬大舖，喬遷至卑利街。看似順利，卻在不久後迎來衝擊，「政府話呢度都要收嚟重建，咁咪又要搬走。」無奈下，搬到同一條街的另一面，繼續打拼。豈料最後連這座大廈也要重建，這一次就真的難倒森哥了不？「嗰時中環搵舖好難㗎！」雖然已屆退休年齡，仔女亦長大成人，可他就是不言休，沒想過就此停下來，不想白費多年來的心血，積極尋找新舖位。也許上天眷顧有心人，他最終遇上貴人，才搬至現址，至今六年，「可能我條命順利啲啊，我就係有啲咁嘅人緣！」回想起以往種種巧合與無奈，他一笑置之，繼續向前。
「呢個客今日嚟同你買嘢，後日再嚟嘅，大後日再嚟嘅，即係成功！」香港人慣於用錢去衡量得失，可是森哥卻不苟同。「佢認為你呢間舖係老實，佢始終唔會走，就算你搬咗佢都會返嚟搵你！」
五十歲才創業，可謂他人生一場重大博弈。只是在他眼中，願意踏出第一步就已經贏了。「初時都好辛苦㗎，又要搵資金入行啦，搵舖啦，啱啱嗰陣仲買咗樓。」膝下還有三名兒女，仍在求學階段，幸得太太支持，「我老婆都話，自己有能力嘅，一定自己出嚟做生意。」心口掛住個「勇」字，「好啦！扚起心肝，搵得幾多就幾多啦！」他笑稱自己並非大戶人家，亦沒有太多積蓄，幸得友人伸出援手，「嗰時個個走嚟問我夠唔夠錢，要幾多啊？」燈油火蠟基本開支有了，那貨錢又如何是好？「我啲朋友好好，個個都話你攞貨返去先，賣咗先嚟畀錢！」患難見真情。最初賣雜貨居多，鹹魚、章魚、冬菇、蝦米、蠔豉，都是中下價乾貨，瑤柱只有兩三個品種，花膠也偏向平價，「你咁大嚿麵粉做咁大個煎堆咋嘛，冇乜所謂㗎。」可惜不久後卻遇上金融海嘯、SARS來襲，風高浪急，生意多少也受影響，可是他未有打退鼓堂。「嗰時咪賣保健湯包同抗疫產品為生囉，冇諗過放棄。」他說。森哥常言，自己條命生得好，朋友多客人多，即使遇到風浪，也不致沒頂，過關斬將，跌跌撞撞又渡過難關。他眼光好，每當遇上靚貨他都會購入，「我認為呢件貨有前途嘅，我就入咗先。」不論平貴，不容錯過，逐少儲貨，「我唔係話買一樣嘢返嚟，聽日就要賣㗎嘛，我唔急！」做生意，機不可失。
昔日的小店現已改賣高價陳舊花膠，「你睇吓我啲裝頭就知我賣咩為主啦。」款式眾多，任君選擇。惟新手必定花多眼亂，不過森哥有問必答，不嫌麻煩，「花膠即係魚嘅魚鰾，有分公乸，係公肚先有功效，乸肚呢係發唔起，亦都冇咩功效。」公肚多數有明顯的氣喉隆起，而且中間偏厚，兩側偏薄；相反乸肚沒氣喉，形狀較扁平。當中以鰵魚膠和白花膠的質素較好且常見。「基本上鰵魚科嘅魚，魚鰾都係靚嘅。」鰵魚膠有補身養顏之效，質地較厚身，膠質重，所以食起上來啖啖肉，口感像年糕，較黏口。白花膠則是藥用價值高，據稱有止痛、增強免疫力等功效，適用於病後欠補。它的口感會較爽滑，「燉佢都唔會溶唔會爛㗎。」雖然大部份花膠外形相似，但其實價值可以差天共地，而且不一定是愈大愈貴，「幾斤重嘅淡水鱸魚膠都唔值錢，鹹水嘅，最平都幾萬蚊一斤㗎啦。」相比起淡水魚及養魚，野生及鹹水魚的魚鰾更好，因為牠們日常可以自由地游走，魚鰾活動量大。因此製成花膠後，口感會較彈牙。
還要留意花膠的新舊，至少都要放上五年以上才有功效，「花膠一定係愈擺得耐愈貴，無可厚非。」要辨別花膠新舊，就得看色水，愈深色愈舊。深黃色就是老身，愈接近黑色就愈老，偏白而透明的就是新水。「仲有，啲紋愈明顯就愈舊，唔係愈多（紋）。」水分被抽乾，就會形成紋理，因此擺放愈久，紋理更分明。以鰵魚膠為例，會看到密集的「雞爪紋」；而白花膠表面就會有清晰的「人字紋」。「當你要食嗰陣時，浸返水，佢一吸返水，隻花膠就必然發得好大，特別爽口，特別厚。」語畢森哥慢慢走近收銀櫃，伸手拉出抽屜，取出一本殘破的簿子。原來這本「天書」是他特別為客人製作，裏頭寫上各種海味的功用與浸發方法，「全部都係我手寫㗎！」他小心翼翼地翻起一頁又一頁，泛黃的紙上，佈滿密麻麻的粗黑字。多年的經驗與心得，他無私分享，「如果唔識發（海味），我咪畀佢睇囉，叫個客影低佢，返屋企跟住做就得。」字的一筆一畫，都以心思構成。若果有客人請求，他甚至會幫忙預先浸發海味，從不計較，寓教於樂。慢慢就儲到一班較年輕的熟客，像米芝蓮星級餐廳VEA行政總廚鄭永麒（Vicky）就常來幫襯同請教，和森哥惺惺相惜。
「呢啲嘢係老人家至識嚟買，後生唔知，梗係啦，老竇老母整好畀佢食，點知啫。老竇老母走咗，佢以為係垃圾丟咗都有，試過有工人執番攞嚟問係乜，我話呢啲咪花膠囉。」森哥說。
香港昔日貴為漁港，漁業興旺，海味業也隨之發展蓬勃。七八十年代，不少本地漁民會自家生曬白花膠，品質相當高，「水質靚，海產必然靚。」隨着生活水平提升，人們對食開始有所要求，花膠需求大增。可是水質污染漸趨嚴重，生態環境被破壞，供應大大減少。加上時代更替，香港搖身一變成為金融重地，漁業也隨之式微。現時大部份海味都來自東南亞、南非等地，本地出產的花膠幾近絕迹，「靚嘅花膠，基本上賣一隻少一隻，賣咗出去，真係搵唔返。」物以罕為貴，店內有不少陳舊花膠都是私人珍藏，在外頭有錢也買不到。此時森哥走向一個膠櫃，隨手拿起一片，「1970年嘅貨，非賣品㗎，我留畀個女嘅，有機會生BB㗎嘛！」他笑言曾有客人欲出高價收購，他都不為所動，親情勝於一切。「賣咗隻咁寶貴嘅花膠出去袋返啲錢返嚟無用，感情呢，錢係買唔到。」平日不時板着臉的他，此刻卻不怕肉麻，淡然道出心底話。
時光霎眼過去，雖然森哥從不覺得工作辛苦，可是仍不得不承認將要退下火線，「我日日都返嚟開舖收舖，你叫我唔做真係有啲唔捨得㗎。」不忍心血就此終結，他坦言希望下一代接手，「如果唔接嘅，（我）做多幾年咪退休囉。」他輕聲嘆道，卻掩蓋不了失落。其實幼子關勇沂（Roy）數年前已回店幫忙，希望有多點時間陪伴老父，亦有意繼承生意。他小時候曾認為海味行業又悶又老土，沒有興趣入行，對爸爸的教導更加是左耳入右耳出。無他，大多數客人都是老人家和家庭主婦，小朋友當然會覺得無聊。長大後認識多了，想法慢慢改變，「我覺得海味係好食嘅，好味嘅嘢我諗所有人都鍾意食㗎啦，不過可能係嫌處理嘅時間麻煩，就少去接觸。」
Roy本來就讀攝影，畢業後一心從事相關行業，「嗰個年紀，梗係想出去試吓博吓㗎啦！」他笑着。其實森哥一直沒有要求子女接手，「鍾意做乜嘢你就出去做啦，畀我嘅自由度都好大。」踏入社會工作數年後，才明瞭爸爸一直以來的辛酸，「知道佢一直以嚟做嘢辛苦，返咗嚟之後，好深感受。」人還是要有所經歷，才有所成長。
拼搏二十年，森哥無悔當初的決定，「舖頭係我第二生命。」他嘴角揚起，皺紋也笑了，彷彿在告訴你，即使身體老了，心境都不能老。七十歲的他，仍舊精壯，就像那艘遠航的船，還在破浪，奮力作業，尚未有回港安舒的意圖。●
地址：中環威靈頓街138號地下
電話：2545 2827
營業時間：8am-6pm
撰文：張芷澄
攝影：陳旭鵬、謝致中、張芷澄
編輯：潘惠卿
美術：魏家祺