【名家足路】
【對決場次︰里爾vs摩納哥】
睇咗三個月《一燈決》，估唔到上個月小弟憑住一注伊巴下盤，第一次壓過咁多位名家成為擂台盟主，今個月將會同「燈神」筋肉人喺《一燈決》同大家傾吓波經。今個月第一場，我哋就揀咗場周日法甲嘅前列大戰里爾主場鬥摩納哥，我嘅心水就係摩納哥，睇吓今次摩納哥可唔可以幫我打響個頭炮先。
摩納哥今季由前拜仁慕尼黑主帥尼高高華執掌，似乎中型班先係呢位克羅地亞主帥發揮嘅好地方，今季佢拎住隊摩納哥，雖然10月曾經歷咗段小低潮，但踏入11月已經回勇，四場聯賽全勝，當中仲反勝過班霸嘅巴黎聖日耳門3:2，而且出咗名陣式多變法嘅尼高高華喺呢4場勝仗入面都用咗3個唔同嘅陣式應戰，相信摩納哥係因應唔同嘅球隊作出唔同嘅部署，今場對住排名高過自己嘅里爾，肯定都會做足功課。球隊前場球員仲要幾「弗」，好似今季喺德甲利華古遜轉投嘅禾蘭，今季聯賽已經入咗五球，加上快馬謝臣馬田斯同中場有法比加斯派牌，成隊個態真係唔錯。
里爾今季同樣喺法甲令人眼前一亮，但球隊一去到要分心應付歐霸戰線，板凳深度唔夠嘅問題就見晒底。自從要雙線發展之後，里爾喺聯賽嘅表現即刻跌晒watt，中場主力連拿度辛捷士仲要傷埋，搞到5場聯賽贏得1場，仲要爆冷輸過畀「升班馬」比斯特。球隊周中歐霸亦都只係僅僅贏到布拉格斯巴達2:1，體力方面一定輸蝕畀摩納哥，摩納哥往績上仲食住里爾，近三次作客都贏晒，今次實掂啦。
文：港生
《一燈決》係今季新欄目，由上月擂台盟主同上月燈神拗吓頸，睇吓讀者信邊個。