16年前，陳漢威初入有線新聞，他憶述知悉獲聘任體育記者一刻，不由自主叫喊起來。他在荃灣這座大樓，捱過每晚壓力大得發噩夢的日子，經歷過與戰友通宵拼搏歲月，也找到一生至愛。但16年後，「快樂新聞部」早已人面全非，劊子手冷冰冰行刑，他捧着一個籃球，在眾多鏡頭前揮別。他說，這天象徵了優秀電視新聞的沒落。
記者：洪量丰
攝影：翁志偉
部份圖片由受訪者提供
行內老前輩說：「不要讓記者成為新聞的主角」，偏偏在風譎雲詭的2020年，記者自身終究也成為頭條，12月1日有線突然裁去40名記者，時任體育組助理採訪主任的陳漢威形容，當日如同電影《大逃殺》的橋段，「好似行刑咁，收到電話就入房，你見有啲人係好從容面對死亡，『Yeah！係我！』咁樣，係有啲唔開心啦當然。」他淡然指早已料到這天的降臨，面對老東家施極刑，沒有不快，只是說不出的心痛，「由當初傳倒閉，到新老細接手，一直有心理準備接受呢個結果，但當真係發生嘅時候就真係好心悒同埋痛心。」有線資源短絀人所共知，然而當日派「大信封」的標準看來卻不符減省開資的原則：「你見到入得去嘅人唔係能力嘅問題、唔係因為佢做得差或者人工特別高、只能夠話大部份係嗰組最top嘅就炒嗰個，標準係點呢就唔知囉。」
「大逃殺」的畫面，陳漢威歷歷在目，其時有線彷彿被劃入異度空間，一面是鐵石無情的殮房，「喺間冷冰冰嘅房度，人事部職員佢唔識我我亦都唔識佢，佢就咁遞封冷冰冰嘅信畀你話你要走喇，我望住隔籬主播劉紫鳳，我話咁多年一齊讀新聞、睇住你結婚，今日仲要一齊走，我哋坐埋一齊迎接啦， 佢（人事部）唔會講乜人性化嘅嘢，仲話『今朝有同事俾人炒咗，你會唔會知道啲條款？』你見到一間公司係冷冰冰嘅。」走出可怕的殮房，迎接他的卻是天淵之別的溫馨，他表示如同結婚般感動，「一出到嚟係超級warm，港聞、攝影、體育同事，甚至前同事，廿幾三十個人圍住你衝埋嚟想安慰你，嘩！嗰刻已經好想喊，我話『唔好再埋嚟，再埋嚟我會喊到停唔到』，結果我都係頂唔順要行一行開先，原來呢個世界好warm，好多人想對你好，呢個真係預計之外嘅嘢。」