《王冠》第四季是歷來最弱的一季，直到第七集才總算回勇，但可能因為逃避現實吧，平常以蝸牛速度爬劇集的我卻追得最緊，兩個星期就看完了──和上架即日不眠不睡由頭煲到落尾的狂迷當然冇得比，刷新的是個人紀錄。前三季劇本有股莎士比亞味，奇怪今季幾乎蕩然無存，只在殖民地前事頭婆和鐵娘子初交鋒的一集露出一點《李爾王》鬍鬚碴，可恨人做一國之君佢又做一國之君，竟試探不出哪個親生骨肉最愛自己。最教人捧腹的對白，是戴安娜為老公生日獻上舞蹈作賀禮翌晨，女皇和皇夫打開報紙閱讀新聞，那個性格十三點的皇夫忽然問「吓，又唔見你跳舞畀我睇哩hea」，女皇冷冷答：「如果冇記錯，閣下有個舞女專事此職。」後生嗰陣，不安於白金漢宮的種馬曾經偷偷參加課外活動，小三是芭蕾舞孃，女皇收到小報告後饒以大義，「你咪以為我唔知啊吓，顧全體面唔踢爆咋吓」，想不到過了幾十年仍有醋意，難怪性別歧視的尚盧高達有部電影叫《女人就是女人》。
另外二公主瑪嘉烈心儀對象出家做神父，失落之餘向皇姐傾訴，皇姐說：「此乃第二個你唔應該中意呢條友嘅理由。」瑪嘉烈問：「咁第一個理由係乜？」冷面笑匠上身的皇姐答：「佢係多樂蒂個friend。」「唔係啩？」「個個都知嘅噃。」連我這麼資深的基佬，也頓一頓才識得哇卡卡卡。嘩，都唔知幾耐世界冇聽過呢個斯文代號，所謂多樂蒂個friend，指的是男同性戀者，養在深宮的貴族縱使無緣蒲基吧，據說侍衛之中不近女色者眾，對基圈暗語瞭如指掌。