【名家足路】
【對決場次︰里爾vs摩納哥】
10月5期《一燈決》贏咗4期，有跟嘅讀者應該幾滿意，12月小弟載譽歸來（苦笑），挑戰者港生第一期揀咗場里爾對摩納哥，法甲又邊會難到我呢，哈哈！
法甲近年一隊獨大，巴黎聖日耳門（PSG）近10年幾乎囊括所有聯賽冠軍，除咗16/17球季被摩納哥打破壟斷；嗰屆摩納哥人強馬壯，有法卡奧、基利安麥巴比、貝拿度施華同班捷文文迪，最後以八分力壓PSG封王。不過，季尾後大部份都轉投大球會，冠軍陣容拆骨，法賓奴泰華利斯踢多一季後，最終又被利物浦挖角，搞到摩納哥近季變咗中游球隊。
今季佢哋有番起色，法比加斯同賓耶達上季首度合作，今季默契好咗，加上利華古遜嘅射手禾蘭加盟，佢同賓耶達夾埋入咗11粒，佔全隊近半入球量，不過入波太過集中嘅話，好易畀人守死。另外，今季作客戰績幾差，5場輸咗3場，呢輪造訪里爾大家睇路啦。
主隊近季表現穩陣，目前仲以較佳得分球領先同分嘅里昂、摩納哥及蒙彼利埃，僅落後榜首2分排第2。里爾本身防守穩健，12場聯賽只失8粒，同PSG睇齊。後衞謝列美派特大腿受傷，佢嘅右閘位有堤亞高迪查路做替補，中路嘅荷西方迪同保治文一定硬淨過「你樽」；前線方面，土耳其老牌國腳耶馬士雖然30有5，但佢今季仲係首席射手，暫時入咗半打，配合一班20出頭嘅攻擊球員，好似耶斯斯、莊拿芬班巴同伊干尼，全部有入球能力，攻得又守得，里爾主場唔會怕摩納哥。
文︰筋肉人
《一燈決》係今季新欄目，由上月擂台盟主同上月燈神拗吓頸，睇吓讀者信邊個。