突然間熟悉的人情湧現，但有些人和事，有些質素有些聲望，失去了也追不回。2004年陳漢威初出茅蘆，短暫擔任文字記者便專職有線，問他「畸寶」有何吸引？「勁囉！top囉！」有線體育新聞優勢，不單在於出鏡和採訪大型運動會機會，更是人與人之間的學習與互動，「有線係個非常欣賞人才嘅地方，領導人都係非常叻、以前係趙應春先生同埋馮德雄先生，佢哋對新聞特別有觸覺同抱負，而且有能力，你跟住佢哋一定有進步。」初入行時一次陳漢威被派去採訪黃金寶出戰單車賽，比賽甫完他已寫畢旁述稿，他以為交妥功課，在上司眼中卻未達標：「佢哋係要有聲有畫，有bite（訪問）有「扒」（鏡頭前報道），隔籬台唔係咁，但佢哋對一個初級記者就係咁高要求。」他直言當年壓力極大，每晚發起噩夢擔心工作有錯漏，通宵更過後回到公司，案上又收到上司長文，點評表現和改善之處，但正正因為與一眾追求完美的「儍佬」工作，為免白費同伴心血，逼使他每日進步，「呢行係好top，無論記者、剪片、攝影、工程都係，點解會慢咗呀？因為我，就搞到攝影師嘅心機冇晒，剪片又等緊你喎，人哋神速剪好喇喎。」
歐聯夜波連場，他一個人要兼顧四場球賽，「同一時間睇四場波係會嘔㗎，好似大廈保安睇cctv咁樣，四個畫面喺度郁，耳仔又要聽住電台。」縱然辛苦，但他津津樂道說與志同道合的同事拼搏，「當時一班師兄弟喺度係良性競爭，你同一時間寫到四隻，我第日都要寫到四隻，甚至要寫到五隻。」陳漢威說行家視有線為參考對象即反映其水平：「個感覺好自豪，我係有線嘅。其他公司會話『cable出咗咩？我哋要跟。」