阿仙奴星期四喺B組對維也納迅速嘅歐霸盃賽事，係球會今季首次批准球迷入場觀戰嘅賽事，兵工廠今場喺2,000名主場球迷打氣下踢得寧舍醒神，最終以4:1大勝取得小組首名晉級資格，連領隊阿迪達都話再見到球迷，隊波嘅士氣都唔同晒，加上喺下周日迎接北倫敦打吡作客前，對手熱刺就只能3:3賽和寧斯，欠缺風光咁獲得出線資格，當堂兩隊士氣就出現偏差。
阿聯酋球場對上一次有球迷入場，已經要數到今年3月7號對韋斯咸嘅英超賽事，事隔271日之後，英國政府終於有限度批准屬於二級「高危」地區嘅倫敦球隊，可以安排2,000名觀眾入場，就連吉祥物「阿仙龍」都一齊回歸！兵工廠呢場歐霸盃，就成為當地解封後首次有球迷入場嘅賽事，但有球迷就乘機舉起「讓奧斯爾歸隊」嘅紙牌，呢幕就幾諷刺！
再次有球迷吶喊助威，一眾阿仙奴球員似乎踢得特別落力，上半場已由拿卡錫迪、柏保路馬尼同尼基迪亞建功遙遙領先3:0。雖然對手換邊後由日本前鋒北川航也破蛋，但兵工廠喺66分鐘再靠史密夫路維錦上添花，最終大勝4:1完場，賽後5戰全勝兼轟入16球，喺歐霸盃B組首名出線。
阿仙奴領隊阿迪達賽後表示，有球迷回歸為球隊帶嚟好大轉變：「我好開心球迷終於返嚟，佢哋令比賽變得好唔同。雖然只有2,000人，但佢哋嘅打氣聲對我哋好有幫助，要多謝佢哋嘅投入同參與。」阿迪達又話，希望球隊喺下星期日嘅北倫敦打吡，都可以踢出同今場一樣嘅好表現。
至於同日都要踢歐霸嘅熱刺，喺J組作客奧地利球隊寧斯就冇咁好彩，今場雖然派出孫興民等主力應戰，不過上半場早早落後下，只能靠加里夫巴利喺12碼點射入職業生涯第200球，追成1:1平手。換邊後熱刺曾經兩度領先，但兩次都畀寧斯扳平，最終被逼和3:3完場。
雖然熱刺今場後確定晉級，但就要喺最後一輪同榜首安特衛普爭首名。領隊摩連奴就唔太滿意球隊表現：「我知道有啲球員踢歐霸盃會特別懶散，今場由熱身開始，我已經感覺到有啲球員覺得自己唔應該喺度。」摩佬賽後又好似上個月輸畀安特衛普咁，透過ig出post表達對球員不滿，上載一張自己喺雪地嘅相，話星期五嘅中午12點就要開操，睇嚟熱刺班球員喺打吡戰真係要醒醒定定。