昔日的輝煌彷如隔世，新聞部資源不足早預兆有線崩壞，2012年有線奪奧運轉播權，新聞台與體育台超過50人前往倫敦，陳漢威在現場見證李慧詩衝線得獎一刻，「好似睇波咁，成個場係震㗎，當時因為英國車手攞冠軍，你嗌李慧詩個名其實係冇人聽到，在場所有行家就變咗李慧詩打氣團，嗌到出唔到聲都會幫佢加油。」輾轉來到2018年雅加達亞運開鑼前夕，有線於開幕不足一個月才獲轉播權，臨急派員採訪，「最後連埋體育台得八個人去，資源有幾盡削到幾盡，以前可能會話租架車，今次就直情自己搭的士啦。」他指有線就如一隊損兵折將的籃球隊一樣，無論場上情況如何惡劣，球員繼續緊守崗位應戰，「打籃球最正規係五個人打，你削到我得四個人，我都照打落去，但係得番三個人去打全場嘅話，其實就已經唔係五個人打全場嗰樣嘢。」
全盛時期體育組曾經同時有九名記者在陣，但如今陳漢威和林普斯兩名資深記者雙雙被裁，有線體育僅餘兩名全職記者，「點樣用兩個人去打全場嘅籃球呢？ 就係咁，佢哋已經盡晒力，拗晒柴都照打落去。」我問假如以足球隊比喻有線呢？他想一想，苦笑道：「可能似巴塞隆拿咁。」彼邦的班霸球隊管理失誤，戰績下滑，主將被掃出門；對比巴塞的衰落，最教陳漢威心傷的不是被公司辭退，更是市民失去接觸具質素的電視新聞報道，本地運動員也少了一個曝光的平台，雖然網絡發達，但他認為始終不能彌補電視畫面的震撼，「有啲嘢係要有畫面去交代，例如何詩蓓贏咗比賽，係因為我哋買咗轉播嘅片先可以報到出嚟。」
米已成炊，雖告別有線，但陳漢威心底依然有個未竟之夢，「我覺得（體育新聞）點都係要本地行先，我做唔到一半，起碼都七三吖。」遙想當年無綫猛削體育新聞時段，這邊廂陳漢威一直極力爭取本地體育於電視新聞的曝光率，「初初入行嘅時候啲人話係七三，其實係九比一，首先佢哋係本地運動員，其次我哋用咗咁多資源，有攝影、有車長、有工程，記者咁辛苦做個專訪返嚟，點解唔可以篇幅多啲，重要性大啲。」無可奈何於香港社會，歐洲足球支持者眾，本地體育經常淪為配角，他指即使李慧詩、江旻憓成為世界頂尖運動員，港人依然無甚關注，「你去過歐洲、日本睇人哋個奧運冠軍、世界冠軍甚至只係學界冠軍，人哋嘅篇幅同respect係幾大，係鋪天蓋地。」
時段有限，資源有限，從預約攝製隊，剪片先後次序，那怕是多一秒鐘的報道，無一不是角力爭取，但他補充指相較其他電視台，惟獨有線才會相對重視體育，「得有線先會提升到體育上頭條，其他台你唔會睇得到重要性，但係有線先會咁放資源，就算未攞金牌，入到四強都要即刻出街。」人先自重而後人重之，這一切某程度上源於體育記者的熱誠和積極，「其他人睇到你嘅付出、質素同熱誠，佢哋會尊敬你，有時排cast（節目內容）嘅同事話今日真係好爆，好多國際同香港大事，但佢點都會留返三分鐘畀你出，有時冇乜咁多嘢就畀返五分鐘你，其實佢一聲令下可以三分鐘都唔畀你，你自己respect一件事，人哋咪respect返你囉。」
