【本報訊】《蘋果日報》創辦人黎智英一直是政權重點打擊對象，有前立法會議員認為，政府連番針對黎智英的打壓行動，是想向外表明，被港府視為與外國有政治聯繫的傳媒人都「沒有好下場」。有學者認為，建制派一直對黎智英口誅筆伐，無法不令人認為此舉是政治打壓，勢要重創新聞自由。前議員和學者也大嘆，黎智英並非殺人放火，如今卻被未審先判，「無啦啦要佢坐五個月，佢犯咗彌天大罪咩？」
曾任職傳媒多年的前立法會議員毛孟靜認為，警方今年8月派逾200警力硬闖壹傳媒大樓搜證，並以涉嫌違反港區國安法及串謀欺詐等罪名，高調拘捕壹傳媒創辦人黎智英等人後，昨再由國安法指定法官蘇惠德拒絕黎智英保釋，反映港府針對黎智英的行動是「昭然若揭」，「盲嘅都睇到（港府）係針對黎智英，就係因為佢係傳媒老闆，亦都因為（黎）喺香港民主運動有凸顯嘅角色」。
她認為政府連番針對黎智英的打壓行動，是想向香港和國際新聞界表達一個訊息，就是被港府視為與外國有政治聯繫的傳媒人都「沒有好下場」，「呢個對香港，呢個曾幾何時係整個亞洲入面新聞自由最蓬勃嘅城巿嚟講，唔止係好諷刺，簡直係一個血淚嘅故事」。她認為從今次案件本質來看，「佢（黎智英）唔係殺人犯吖嘛，你就會覺得出奇，點解佢會不能保釋？佢不能夠保釋，即係等於變相要佢坐監，仲要佢一坐就坐超過四個月」。
中大政治與行政學系高級講師蔡子強認為，實在不能理解為何單憑欺詐罪行，法庭不准黎智英保釋，案件至明年4月才開審，即變相是未審先判，「無啦啦要佢坐五個月」，他認為此舉對事主不公道，「今次純粹係商業欺詐，佢本身無前科，法庭話佢有畏罪潛逃嘅可能，點樣證明？佢犯咗彌天大罪咩？佢殺人放火？」他認為從黎作為傳媒機構老闆的背景，加上近年建制派一直對黎口誅筆伐，無法不令人認為此舉是政治打壓。
佔中發起人、中大社會學系前副教授陳健民昨亦在facebook發文，指政權最想關柙的是新聞自由：「肥佬黎真是勇者無懼！」