出爐金馬最佳劇情短片《夜更》中，「一哥」蔡志強演活淺藍的士司機要搵食的草根形象，不過本身為東區區議員的他，平日總是官仔骨骨，與片中市井造型、粗口流利的形象大相徑庭，其實他確是一名的士司機，且入行逾十年。日前他接受《蘋果》訪問，道出他演出短片的經過及趣事，指毅然從政是因虧欠年輕人，戲內戲外他均慨嘆：「香港係咪冇得救？」
渾然天成的粗口「X！兜Ｘ咗成粒鐘，唔Ｘ使做啦！個Ｘ個去晒遊行？」在《夜更》先聲奪人，蔡志強（阿一）飾演的《夜更》的士佬入型入格，為這齣出爐金馬最佳劇情短片，添上不可或缺的喜感。更戲劇性的是，現實與戲中的他判若兩人，阿一平日一身西裝一副文質彬彬的打扮，實情他是東區翠德區議員。
日前阿一於他那狹小的議員辦事處接受《蘋果》訪問，剪了一頭爽朗短髮的他，以黑西裝配sharp醒橙色領呔示人。現實中阿一確實是一名的士司機，入行逾十年，亦因為此，完全沒有拍戲經驗，他在機緣下經另一區議員張正皓介紹，認識了《夜更》導演郭臻。「其實當初導演係搵張正皓借車，都唔知道佢係區議員，後來問我借，仲問我有冇興趣拍。我覺得如果可以幫助到電影業，都可以幫手嘅。」
阿一指其實接拍電影，題材不是考慮因素，而且拍完都沒有告訴其他人，「其實冇乜人知，我屋企人都唔知，我又冇好主動去話畀人聽，直到南方影展攞咗獎，開始有啲街坊見到有呢個報道，我先至開始話畀人聽。」阿一表示因為導演認為普羅大眾對的士司機認知的形象，和他有出入，所以設計另一個形象給他：「基本上成個角色都係要靠演出，因為同我本人理念講嘢方式，以及衣着都好大出入。」
不過電影裏的士司機經過接載不同乘客和經歷的事情，心態上有了微妙變化，只參與過教會小型舞台劇的阿一，都演繹得精準到位，沒有over，阿一說：「導演話其實一個人，好難喺一晚裏面突然間有咁強烈嘅轉變。如果係咁就太戲劇性。」然而，他覺得若然大眾看過電影，經反覆思考和沉澱，說不定能夠有些改變，「或者感受到其實係咪搵食就大晒？係咪就可以無視身邊發生嘅事？」
《夜更》裏有不少場景，是於去年反送中運動的示威現場拍攝。儘管阿一在傘運時已「見慣大場面」，但當荷槍實彈的警方敲打其車窗，喝令他們停機時，難免也有點怯，「兩邊陣營都覺得你有問題，我哋喺車廂入面有打燈，外面嘅人可能睇到我哋係揸住鏡頭，舊年大家好介意人哋影到佢哋個樣。」而阿一指最驚的不是自身安全，「唔係驚佢濫捕我，反而係同導演一樣，驚會唔會話攞咗我哋嘅記憶卡，拍咗啲嘢會冇晒呢？」
阿一於電影中後段有跟戲中女兒透過視訊通話的場面，他叫女兒於外地留學不要返香港發展，大呼「香港冇得救」，但他指：「拍嘅時候嗰句對白對我嚟講都仲好遙遠，你話嗰刻係咪冇得救，拍嘅時候嗰一刻都唔覺，甚至乎今年年頭都冇呢種感覺，但嚟到國安法成立咗之後，你見到香港人嗰個寒蟬效應自我審查。當一個社會只可以容納一種聲音嘅時候，其實係咪邁向緊冇得救？」
去年當選區議員後，阿一偶爾也會在自己環頭踩番兩轉，「揸的士本身enjoy嘅，因為你每一日都面對緊唔同嘅乘客，每個人都有自己唔同嘅故事，我哋基本上係見證晒人嘅一生，大肚婆去醫院生仔，跟住到去搵小學搵中學，逼人罰留堂，跟住去搵大學，拍拖、分手、結婚、生仔，甚至乎到醫院探病，到送殯最後一程，的士就見證晒人生唔同過程，同埋每個人唔同階段有啲乜嘢睇法。」阿一更直言揸的士算是收集民意的另類方法。
