關於炒股的劇集久不久就會出現，因為財經市場總是那麼複雜，很多行外人都想加深瞭解，希望藉此幫助自己投資搵銀，而且炒股不時涉及大金額上落，睇落都刺激。近日HBO拍了一套《敵爭上游》（Industry），細節上更力求真實，值得一看。
劇集以底層人物出發，切入角度新鮮，講一班畢業生加入倫敦一家投資銀行，以最醒目的黑人女生脫穎而出上位做主線，亦提到其他新人如何努力掙扎，當中除了真實反映在投資銀行內工作的情況，講及各種辦公室政治尤其出色，例如各小頭目的權力鬥爭，低層以竊取好友情報取悅上級，弱勢的新人受到惡毒上司欺凌等，相信所有曾在大公司工作的人都輕易有共鳴。而眾主角雖然都採用陌生面孔新演員，但難得演出毫不生澀，令人更易投入相信真有其事。
故事情節人物逼真，主要是歸功兩個編劇Mickey Down及Konrad Kay，他們曾分別於著名投行羅斯柴爾德及摩根士丹利打工，取材身邊個案話咁易。劇集也有展現金融界大上大落大壓力背後，相當令人羨慕的酒色財氣，包括傾公事時出入高級餐廳，賺到錢包酒店住，選擇糜爛生活的更吸毒夜蒲，邪惡得來卻是不少觀眾都想看的一面。
一向擅長拍色情場面的HBO，今次亦不吝嗇大灑鹽花，眾主角不論男人定女人，全部都性需求甚高，而除男女親密場面，亦拍出不少男男同性戀的情慾挑逗，包括大力楂下體及接吻場面，這在主流電視劇仍算大膽少見。另外必要出現的意氣風發大客戶，亦有細緻描寫，例如有女富豪點餐時就話：「等我哋飲啲唔好聞落似油漆稀釋液嘅紅酒」，新人推銷投資工具，睇中你仍然要性騷擾。
至於講到可唔可以偷師學賺錢，對白就略嫌太深術語太多，例如講沽空美國國債，就全部用外星語去表達，其實睇兩次都唔係好明，但劇集賣弄之餘也很坦白，當有職員向客人推銷較複雜的賺錢工具，原來富豪也會因不了解產品而拒絕。其實講到尾，炒股就如賭博，有幾多人買滙豐真正瞭解其公司及股價上落原因？好多人申請買螞蟻金服，甚至連馬雲同馬化騰都搞唔清啦。
撰文：翁可人
本欄逢周五刊出
酷愛煲劇睇戲，冷門熱門乜都殺，小說《師戀高校》及《87年12歲條女失咗蹤》作者。