造價半億嘅觀塘海濱音樂噴泉一直備受爭議，民主派區議員上場後曾要求煞停工程同埋公開合約內容，但政府拒絕。今年4月，觀塘區議員梁凱晴聯同東九龍社區關注組成員鍾健華入稟提司法覆核，質疑民政事務總署未就工程諮詢現屆區議會，但因為法援署拒批法援，佢哋最終決定撤回司法覆核申請。
梁凱晴同八方講，法援署話佢嘅資產超出上限而拒批法援申請，預料另一申請人鍾健華嘅法援申請都唔樂觀，經律師建議後，二人決定撤回司法覆核申請，現正處理相關文件。
梁凱晴又話，喺司法覆核排期期間，音樂噴泉正無間斷施工，相信項目會喺明年中落成，料區議會難以推翻。除了梁凱晴，觀塘區議會10月都通過成立工作小組跟進音樂噴泉問題，並考慮以區議會名義申請司法覆核。
李八方